Таътили баҳории хонандагони муассисаҳои таҳсилоти миёнаи умумии кишвар аз 20-ум то 29-уми март довом мекунад.

Тавре ки АМИТ «Ховар» бо такя ба маълумоти маркази матбуоти Вазорати маориф ва илми Ҷумҳурии Тоҷикистон хабар медиҳад, таътили баҳории хонандагон расман 5 рӯз, яъне аз 25-ум то 29-уми март буда, бо иловаи рӯзҳои расмии истироҳат дар ҷашни Наврӯз, ки ба 20-24 март рост меояд, хонандагон дар маҷмуъ 10 рӯз истироҳат мекунанд.

Дар ин росто, тарбиятгирандагони муассисаҳои томактабӣ низ аз 20-ум то 29-уми март истироҳат мекунанд, вале донишҷӯёни муассисаҳои олии касбӣ бошанд, аз 20-ум то 25-уми март ба таътили баҳорӣ мебароянд.

“Таътили баҳорӣ танҳо ба хонандагон дахл дошта, омӯзгорон дар ин муддат ба корҳои методӣ ва гузаронидани маҷлисҳои падару модарон, суҳбат бо волидайни хонандагон ва чорабиниҳои таълимӣ ҷалб мешаванд”, - менависад манбаъ.

Dialog.tj