Тибқи иттилои Маркази миллии тестии назди Президенти Ҷумҳурии Тоҷикистон, бақайдгирии довталабон барои иштирок дар имтиҳонҳои марказонидаи дохилшавӣ (ИМД) аз 2-юми марти соли равон оғоз мешавад.

Манбаъ меафзояд, ки даври якуми бақайдгирии довталабон то охири моҳи апрел давом меёбад.

Гуфта мешавад, ки имсол дар 43 шаҳру ноҳияи кишвар 50 нуқтаи доимии бақайдгирӣ ва дар 17 шаҳру ноҳияи дигар нуқтаи сайёри бақайдгирӣ амал мекунад.

“Мувофиқи тартиби муқарраргардида бақайдгирӣ бо ҳузури довталаб ва хоҳиши ӯ, новобаста аз ҷойи истиқоматаш, дар ҳар кадоме аз нуқтаҳои бақайдгирии шаҳру ноҳияҳои интихобгардидаи кишвар сурат мегирад”, - зикр мегардад дар иттилоияи ММТ.

Ҳамчунин, иттилоъ дода мешавад, ки арзиши хизматрасонӣ барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон барои шахсони беимтиёз (дорои таҳсилоти миёнаи умумӣ, ибтидоии касбӣ ё миёнаи касбӣ) 370 сомонӣ ва барои онҳое, ки таҳсилоти умумии асосӣ синфи 9-ум доранд, 320 сомонӣ муқаррар гардидааст.

Дар ин росто, “кӯдакони маъюб” ва маъюбони гурӯҳҳои I ва II, ки падару модарашон дар қайди ҳаёт ва солим мебошанд (дорои таҳсилоти миёнаи умумӣ, ибтидоии касбӣ ё миёнаи касбӣ) 185 сомонӣ ва барои онҳое, ки таҳсилоти умумии асосӣ синфи 9-ум доранд, 160 сомонӣ муқаррар шудааст.

Ҳамин тавр, боз ба як қатор довталабон имтиёз пешбинӣ гардидааст, ки маълумоти мазкур дар сомонаи расмии ММТ дастрас аст.

Dialog.tj