Раиси ФИФА бо вуҷуди нооромиҳои ахир дар Мексика таъкид кард, ки омодагиҳо барои баргузории Ҷоми ҷаҳонӣ идома дорад.

Ба гузориши расонаҳо, раиси Федератсияи ҷаҳонии футбол (ФИФА) дар авҷи нооромиҳои Мексика ба пурсишҳо дар бораи мизбонии Ҷоми ҷаҳонии 2026 посух дод.

Ҷанни Инфантино, раиси ФИФА дидгоҳи худро дар бораи эҳтимоли баргузории мусобиқоти 2026 (FIFA World Cup) дар Мексика дар шароите, ки ин кишвар бо танишҳо рӯбарӯст, баён кард.

Инфантино изҳор дошт: “Вазъият ором аст ва дар ҳоли ҳозир ҳама чиз одӣ ба назар мерасад. Дар маҷмуъ, интизор меравад ҳама чиз ба сурати равон пеш равад”.

Рӯзи якшанбе амалиёти вижаи неруҳои мусаллаҳи Мексика ба кушта шудани Немесио Осегера, маъруф ба “Эл Менчо”, раҳбари яке аз бузургтарин картелҳои маводи мухаддири ин кишвар, яъне “Насли ҷадиди Халиско” анҷомид. Дар пайи ин рӯйдод, дар чандин шаҳри Мексика нооромиҳо шакл гирифт. Дар баъзе манотиқ, аз ҷумла Гвадалахара, ки аз шаҳрҳои мизбони яке аз дидорҳои барномарезишуда миёни тимҳои Испания ва Уругвай аст, аъзои картел бо оташ задани мошинҳо ва бастани роҳҳо боиси моҷаро шуданд.

Бар асоси барномарезиҳо, мусобиқоти Ҷоми ҷаҳонии 2026 аз 11-уми июн то 19-уми июл дар се кишвар — Иёлоти Муттаҳида, Мексика ва Канада баргузор хоҳад шуд. Дар Мексика шаҳрҳои Мехико, Монтеррей ва Гвадалахара ба унвони мизбони мусобиқот интихоб шудаанд.

Dialog.tj