Ҳайбатуллоҳ Охундзода, раҳбари гурӯҳи террористии Толибон тайи як “қонун”-и ҷазоии 90-саҳифаи нав, латукӯб кардани занон аз ҷониби ҳамсаронашонро қонунӣ кардааст.

Рӯзномаи “Телеграф” рӯзи панҷшанбе, 19-уми феврал ба нусхае аз ин “қонун” даст ёфтааст, ки ба додгоҳҳои саросари Афғонистон ироа шудааст.

Тибқи ин “қонун” мардон иҷоза доранд ҳамсари худро латукӯб кунанд, ба шарти он ки осори шикастагӣ ё захм дида нашавад.

Дар “қонун”-и Толибон омадааст, ки латукӯби занон муҷозоти ихтиёрӣ дониста мешавад ва на ҷурм.

Бар асоси гузориш, ҳатто дар мавридҳое, ки ҷароҳати ҷиддӣ қобили исбот бошад, ҳадди аксари муҷозот 15 рӯз зиндон аст.

Ин қонун ба гунае навишта шудааст, ки амалан исботи шароити лозим барои муҷозот тақрибан ҳаргиз мумкин набошад.

Дар ин гузориш омадааст: “Барои пайгирии шикоят зан бояд шахсан захмҳои худро дар баробари як қозии мард нишон диҳад, дар ҳоле ки комилан пӯшиш дошта бошад ва як сарпарасти мард ӯро ҳамроҳӣ кунад”.

Бино бар гузориш, моддаи 34 мегӯяд, зане, ки бидуни иҷозаи шавҳараш, ҳатто барои фирор аз хушунат ба хонаи падару модараш биравад, бо муҷозоти ҳадди аксар се моҳ зиндон рӯ ба рӯ мешавад.

Аъзои хонаводае, ки ба ӯ паноҳ диҳанд низ ба ҳамин муҷозот маҳкум хоҳанд шуд.

Гурӯҳи террористии Толибон эълом кардааст заноне, ки аз ин қонуни нав сарпечӣ кунанд, боздошт ва зиндонӣ хоҳанд шуд.

Ин дар ҳолест, ки Толибон интиқод аз “қонун”-и сохташуда тавассути ин гурӯҳро ҷурм эълом кардаанд.

Пеш аз ин, Толибон дар “усулномаи ҷазоии маҳоким” ғуломдориро ба расмият шинохта ва ҷомеаро ба чандин табақа тақсим кардаанд.

Dialog.tj