Гурӯҳи террористии Толибон эълом карданд, ки дар идомаи раванди ихроҷ ва бозгашти иҷбории паноҳҷӯёни Афғонистон, рӯзи гузашта 812 хонавода шомили чаҳор ҳазору 214 тан ба кишвар бозгардонда шудаанд.

Ҳамидуллоҳ Фитрат, муовини сухангӯи Толибон рӯзи чоршанбе, 18-уми феврал дар хабарномае гуфта аст, ки бештарин омори бозгашткунандагон аз тариқи марзи Турхам сабт шуда ва 591 хонавода шомили се ҳазору 150 тан аз ин масир вориди Афғонистон шудаанд.

Бар асоси хабарнома, 155 хонавода аз марзи Спин Булдак, 39 хонавода аз марзи вилояти Нимрӯз, 19 хонавода аз масири Исломқалъа ва ҳашт хонаводаи дигар аз марзи Баҳромчаи Ҳилманд ба Афғонистон бозгардонда шудаанд.

Дар ҳамин ҳол, Комиссариати олии паноҳандагони Созмони Милали Муттаҳид низ эълом карда буд, ки ҳазорон афғон ҳар рӯз аз Покистон ба Афғонистон бозгардонда мешаванд ва бо камбуди ҷойи зист, хадамоти тандурустӣ ва мушкилоти шадиди иқтисодӣ рӯ ба рӯ ҳастанд.

Бозгаштҳои иҷборӣ дар ҳоле идома дорад, ки Афғонистон ҳамзамон бо буҳрони иқтисодӣ, хушксолӣ, зилзила, селоб ва мавҷи густардаи ихроҷи паноҳҷӯён мувоҷеҳ аст: шароите, ки вазъияти хонаводаҳои бозгашткунандаро ба маротиб душвортар кардааст.

Dialog.tj