Тавре ки Федератсияи футболи Тоҷикистон хабар медҳиҳад, пагоҳ, 10-уми феврал дар шаҳри Душанбе қисми ниҳоии Eurol-Ҷоми ФФТ-2026 оғоз мешавад, ки маблағи умумии ҷоизаҳои он 100 000 сомониро ташкил медиҳад.

Имрӯз, 9-уми феврал маросими қуръакашии ҷадвали бозиҳои қисми ниҳоии Eurol-Ҷоми ФФТ-2026 доир гашт.

Ҳамин тавр, ба гурӯҳи «А» дастаҳои «Барқчӣ» (Ҳисор), «Ҳулбук» (Восеъ), «Рангон» (Рӯдакӣ) ва «Истаравшан» (Истаравшан) шомил гардиданд. Дар гурӯҳи «Б» бошад, дастаҳои «Панҷшер» (Ҷалолиддини Балхӣ), «Ҳосилот» (Фархор), «Парвоз» (Фурудгоҳи байналмилалии Хуҷанд) ва «Сардор» (Турсунзода) қарор гирифтанд.

Гуфта мешавад, ки аз 10-ум то 20-уми феврал бо иштироки ҳашт даста қисми ниҳоии Eurol-Ҷоми ФФТ-2026 баргузор мегардад. Бозиҳо дар майдони эҳтиётии Варзишгоҳи марказии Душанбе ва инчунин, дар майдони сунъии варзишгоҳи КМВА сурат мегиранд.

Иттилоъ дода мешавад, ки мувофиқи низомномаи мусобиқа ду дастаи беҳтарин аз ҳар гурӯҳ ба даври ниманиҳоӣ роҳ меёбанд. Финали Eurol-Ҷоми ФФТ-2026 20-уми феврал дар Варзишгоҳи марказии Душанбе баргузор мешавад.

Dialog.tj