Раёсати Вазорати корҳои дохилӣ дар вилояти Хатлон хабар дод, ки 20 хонандаи мактаб дар вақти дарсӣ дар маркази бозиҳои компютерӣ ба бозиҳои гуногуни зараррасон машғул буданд.

Манбаъ меафзояд, ки Шуъбаи огоҳонӣ ва пешгирии ҳуқуқвайронкунии ноболиғону ҷавонони Раёсати ВКД дар вилояти Хатлон дар ҳудуди ноҳияи Шаҳритус зимни амалёти санҷишӣ 20 хонандаи МТМУ рақами 1 ноҳияи мазкурро дар вақти дарсӣ ба ҷойи дарс дар маркази бозиҳои компютерӣ дастгир намуд.

Гуфта мешавад, ки нисбат ба волидони 20 хонандаи дастгиршуда барои бемасъулиятӣ дар таълиму тарбияи фарзанд протоколи  маъмурӣ бо моддаи 90-и Кодекси ҳуқуқвайронкунии маъмурии  Ҷумҳурии Тоҷикистон тартиб дода шуд.

Инчунин, нисбат ба роҳбари маркази бозиҳои компютерии “Кибер клуб” Камолов Азимҷон Ҳамидович, соли таваллудаш 1994, сокини ноҳияи Шаҳритус барои ба ноболиғон додани иҷозати воридшавӣ ба маркази бозиҳои компютерӣ дар вақти дарсӣ тибқи талаботи моддаи 479 қисми 1-и Кодеси ҳуқуквайронкунии маъмурии Ҷумҳурии Тоҷикистон бо қарори Суд  ҳабси маъмурӣ ба муҳлати 5 шабонарӯз таъин карда шуд.

Dialog.tj