22-юми декабр дар ҳошияи нишасти ғайрирасмии сарони давлатҳои ИДМ, мулоқоти Президенти Ҷумҳурии Тоҷикистон муҳтарам Эмомалӣ Раҳмон ва президенти Федератсияи Русия Владимир Путин баргузор гардид, ки дар он ҷанбаҳои муҳими ҳамкории дуҷониба ва бисёрҷониба миёни Тоҷикистон ва Русия баррасӣ шуд.

Президенти Федератсияи Русия Владимир Путин ба Президенти Ҷумҳурии Тоҷикистон ва наздикону пайвандони Қобилҷон Алиеви фавтида ҳамдардии амиқ баён намуда, таъкид дошт, ки чунин амалкардҳои террористӣ, бахусус нисбати кӯдакон аз доираи фаҳмиши инсонӣ берун аст.

Аз ҷараёни суҳбати роҳбарони Тоҷикистону Русия навори кӯтоҳе дар шабакаҳои иҷтимоӣ давр мезанад, ки дар он Владимир Путин чунин мегӯяд: “Анҷом додани амалиётҳои террористӣ нисбат ба кӯдакон нафратангез аст. Тафтишот то охир анҷом хоҳад ёфт ва гунаҳкорон, агар якчанд нафар бошанд ҷазо хоҳанд гирифт”.

Ҳамчунин, Сарвари давлат Эмомалӣ Раҳмон қатли Қобилҷон Алиеви 10-соларо ғайричашмдошт гуфта, изҳор доштанд: “Мо мехоҳем, ҳодиса аз тарафи сохторҳои интизомии шумо бодиққат таҳқиқ шавад ва ба гунаҳкор ҷазои сахт таъин гардад”.

Dialog.tj