Тавре ки маркази матбуоти Вазорати маориф ва илми Ҷумҳурии Тоҷикистон хабар медиҳад, Раҳим Саидзода, вазири маориф бо мақсади шиносоӣ бо раванди таълиму тарбия, сифати дарсҳо, фаъолияти омӯзгорон ва шароити моддию техникӣ аз Муассисаи таҳсилоти миёнаи умумии №31-и ноҳияи Шоҳмансури шаҳри Душанбе боздид намуд.

Ба навиштаи манбаъ, зимни боздид вазири маориф ва илм бо омӯзгорон ва хонандагон суҳбати озод анҷом дода, аз сатҳи дониш, малака ва ҷаҳонбинии хонандагон изҳори қаноатмандӣ намуд. Ҳамчунин, ба омӯзгорон ҷиҳати боз ҳам баланд бардоштани сифати таълим, истифодаи васеи усулҳои муосири омӯзиш ва ҷалби хонандагон ба фанҳои дақиқ ва омӯзиши забонҳои хориҷӣ дастуру тавсияҳои мушаххас дод.

Гуфта мешавад, ки дар вохӯрӣ Раҳим Саидзода вобаста ба Паёми Президенти Ҷумҳурии Тоҷикистон муҳтарам Эмомалӣ Раҳмон, ки 16-уми декабр ироа гардид, ишора намуда, таъкид кард, ки бо мақсади баланд бардоштани сатҳи зиндагии омӯзгорон ва ҳавасмандсозии кадрҳои соҳа, маоши омӯзгорон боз ҳам 25 фоиз зиёд мегардад, ки ин иқдом бозгӯи ғамхории пайвастаи Ҳукумати Ҷумҳурии Тоҷикистон нисбат ба аҳли маориф мебошад.

Dialog.tj