11-уми декабр Маркази миллии тестии назди Президенти Ҷумҳурии Тоҷикистон натиҷаҳои даври чоруми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистонро эълон кард.

Манбаъ меафзояд, ки маълумоти мухтасар дар бораи натиҷаи имтиҳонсупории ҳар як довталаб ба телефони мобилиаш дар шакли паёмак (SMS)-и ройгон фиристода шудааст.

“Агар дар паёмаки ба довталаб фиристода матни “Ба озмуни тақсимот РОҲ ЁФТЕД.” дарҷ гардида бошад, пас, довталаб ба озмуни тақсимот ба муассисаҳои таълимӣ аз рӯйи комбинатсияҳои ихтисосҳои интихобкардааш роҳ ёфтааст. Агар дар паёмаки ба довталаб фиристода матни “Ба озмуни тақсимот РОҲ НАЁФТЕД.” дарҷ гардида бошад, ин чунин маънӣ дорад, ки довталаб бинобар аз як ё якчанд субтести қисми А ё аз қисми В (агар чунин имтиҳонро супорида бошад) соҳиб нагардиданаш ба холи гузариш ба озмуни тақсимот роҳ наёфтааст”, - навиштааст ММТ.

Таъкид мегардад, ки ба озмуни тақсимот роҳ ёфтан маънои донишҷӯ шуданро надорад, балки довталабонро 22-юми декабр озмуни тақсимот интизор аст. Довталаб дар сурате донишҷӯ мешавад, ки аз рӯи яке аз ихтисосҳои интихобкардааш дар озмуни тақсимот комёб гардад.

Ҳамчунин, Маркази милии тестӣ иттилоъ медиҳад, ки қабули аризаҳои апеллятсионӣ дар бораи норозӣ будан аз холҳои гузошташуда дар даври чоруми ИМД 2025 – қисми А (имтиҳон дар заминаи таҳсилоти умумӣ – синфи 11-ум) дар давоми 3 рӯз пас аз эълони натиҷаҳо, яъне аз 11 ум то 13 уми декабр дар бинои Маркази миллии тестии назди Президенти Ҷумҳурии Тоҷикистон (шаҳри Душанбе), бахшҳои минтақавии раёсати ташкил ва идораи имтиҳони Марказ дар шаҳрҳои Хоруғ, Хуҷанд, Панҷакент, Бохтар, Кӯлоб ва ноҳияҳои Данғара ва Рашт ба роҳ монда мешавад.

Dialog.tj