Тавре ки шуъбаи рушди сайёҳии Мақомоти иҷроияи ҳокимияти давлатии шаҳри Душанбе хабар медиҳад, бо мақсади рушди инфрасохтори сайёҳӣ, таъмини дастрасии шаҳрвандон ва меҳмонону сайёҳони хориҷӣ ба иттилооти боэътимод дар бораи маконҳои таърихию фарҳангӣ дар пойтахти мамлакат лоиҳаи инноватсионии “QR-роҳнамо” таҳия ва амалӣ карда мешавад.

Иттилоъ дода мешавад, ки лоиҳаи мазкур дар ҳамкорӣ бо ҷомеаи шаҳрвандӣ таҳия гардида, ба сокинон ва сайёҳони дохилию хориҷӣ имкон медиҳад, ки тавассути “скан” намудани рамзҳои QR дар бораи 45 иншооти таърихӣ, фарҳангӣ ва сайёҳии пойтахт бо забонҳои тоҷикӣ, русӣ ва англисӣ дар шакли матнӣ ва аудиоӣ маълумоти муфассалро дастрас намоянд.

Гуфта мешавад, ки аломатҳои “QR-роҳнамо” аз санги мармар омода шуда, дар назди ҳар иншоот насб мегарданд. Маълумоти муфассал оид ба ҳар мавзеъ дар портали расмии сайёҳии шаҳри Душанбе “Dushanbe Travel” ҷойгир карда шудааст.

Манбаъ меафзояд, ки дар асоси қарори раиси шаҳри Душанбе минбаъд низ барои насби “QR-роҳнамо” дар назди бинову иншооти сайёҳӣ ва маконҳои таърихию фарҳангии дигар тадбир андешида мешавад.

Dialog.tj