Имсол ба даври чоруми Озмуни ҷумҳуриявии «Фурӯғи субҳи доноӣ китоб аст» 434 довталаб аз шаҳру ноҳияҳои ҷумҳурӣ, аз ҷумла 74 довталаб аз Вилояти Мухтори Кӯҳистони Бадахшон, 90 нафар аз вилояти Суғд, 90 нафар аз вилояти Хатлон, 90 нафар аз ноҳияҳои тобеи ҷумҳурӣ ва 90 довталаб аз шаҳри Душанбе роҳ ёфтанд ва ба ҳамаи онҳо сертификати имтиёзнок тақдим мегардад.

Тавре ки АМИТ «Ховар» бо такя ба маълумоти Вазорати маориф ва илми Ҷумҳурии Тоҷикистон хабар медиҳад, сертификат ба иштирокчиён имтиёз медиҳад, ки онҳо то се сол аз рӯйи равияҳои гуманитарӣ ва педагогӣ бе имтиҳонҳои Маркази миллии тестии назди Президенти Ҷумҳурии Тоҷикистон ба муассисаҳои олии мамлакат ба таври ройгон дохил шаванд.

Таъкид мегардад, ки дар даври ниҳоии озмун ғолибони ҷойҳои якум, дуюм, сеюм ва гирандаи Шоҳҷоиза имтиёз доранд, ки ба муассисаҳои олии мамлакат ба равияи дилхоҳашон ройгон ва бе супоридани имтиҳон шомил гарданд.

Ҳамчунин, гуфта мешавад, ки хонандагон ва донишҷӯёне, ки дар муассисаҳои таълимӣ дар гурӯҳҳои пулакӣ таҳсил менамоянд, ҳангоми дар даври ҷумҳуриявии озмун сазовори ҷойҳои якум, дуюм, сеюм ва ё Шоҳҷоиза гардиданд, ба гурӯҳи ройгони таҳсил гузаронида мешаванд.

Dialog.tj