Ҷумҳурии Тоҷикистон хатсайри нави ҳавоиро миёни шаҳрҳои Машҳад ва Кеш бо Душанбе ифтитоҳ кард. Агентии авиатсияи граждании назди Ҳукумати Ҷумҳурии Тоҷикистон эълон кард, ки ин иқдом дар доираи густариши ҳамкориҳои дуҷониба ва рушди нақлиёти ҳавоӣ сурат мегирад.

Агентии авиатсияи граждании назди Ҳукумати Ҷумҳурии Тоҷикистон дар саҳифаи расмии худ дар Фейсбук хабар дод, ки баъд аз мулоқоти Ҳабибулло Назарзода, роҳбари ин ниҳод бо Ҳусейн Порфарзона, раиси Созмони авиатсияи граждании Эрон аз рӯзи чоршанбе парвозҳои ширкати ҳавопаймоии Реймон дар масири Машҳад-Душанбе-Машҳад ба таври расмӣ оғоз мегардад. Ин парвозҳо ҳафтае ду бор анҷом меёбад.

 Ҷонибҳо, ҳамчунин, дар хусуси ифтитоҳи масирҳои эҳтимолии дигар, аз ҷумла Кеш-Хуҷанд ва Шероз-Душанбе, ҳамчунин, ҳамкориҳои омӯзишӣ ва баланд бардоштани малакаи кормандони авиатсионӣ гуфтугӯ доштанд.

Ин ниҳоди Тоҷикистон иттилоъ дод, ки аз рӯзи ҷумъаи ҳафтаи равон парвозҳои озоишии ширкати Кеш-Эйр дар хатсайри Кеш-Душанбе низ дар барнома аст.

Тибқи ин гузориш, фаъол шудани роҳҳои нави парвозӣ баъд аз давраи коҳиши парвозҳо дар замони пандемия, ба эҳёи тадриҷии робитаҳои ҳавоӣ миёни Тоҷикистон ва Эрон мусоидат намудааст. Дар тирамоҳи соли гузашта низ парвозҳои мустақим миёни Душанбе ва Теҳрон дубора фаъол шуда буданд, ки ба афзоиши робитаҳои сайёҳӣ, тиҷоратӣ ва иқтисодии ду кишвар кумак мекунад.

Тоҷикистон ҳамчунин, сиёсати “Осмони боз” -ро дар фурудгоҳи худ ба роҳ монд. Барои хидматрасонии фурудгоҳӣ ва навигатсионӣ 40 фоиз тахфиф пешниҳод мекунад, то ширкатҳои ҳавопаймоии хориҷӣ бештар ҷалб ва масирҳои байналмилалӣ густариш ёбанд.

Dialog.tj