Тавре ки АМИТ “Ховар” бо такя ба маълумоти Вазорати маориф ва илми Ҷумҳурии Тоҷикистон хабар медиҳад, ки 14-уми ноябр дар шаҳри Душанбе даври чоруми Озмуни ҷумҳуриявии “Фурӯғи субҳи доноӣ китоб аст” оғоз мегардад.

Гуфта мешавад, ки дар даври ниҳоии Озмуни ҷумҳуриявии “Фурӯғи субҳи доноӣ китоб аст” 434 довталаб аз шаҳру ноҳияҳои ҷумҳурӣ, аз ҷумла 74 довталаб аз Вилояти Мухтори Кӯҳистони Бадахшон, 90 нафар аз вилояти Суғд, 90 нафар аз вилояти Хатлон, 90 нафар аз ноҳияҳои тобеи ҷумҳурӣ ва 90 довталаб аз шаҳри Душанбе иштирок хоҳанд кард.

Дар озмуни мазкур хонандагони муассисаҳои таҳсилоти миёнаи умумӣ, хонандагон ва донишҷӯёни муассисаҳои таҳсилоти ибтидоӣ, миёна ва олии касбӣ, баъд аз муассисаҳои таҳсилоти касбӣ, омӯзгорони ҳама зинаҳои таҳсилот, ходимони илмию адабии муассисаҳои илмию эҷодӣ, фарҳангу санъат, калонсолон ва намояндагони касбу кори гуногун миёни ҳам сабқат мекунанд.

Гуфтан бамаврид аст, ки имсол соли ҳафтум мебошад, ки Озмуни ҷумҳуриявии “Фурӯғи субҳи доноӣ китоб аст” бо сарпарастии Президенти Ҷумҳурии Тоҷикистон муҳтарам Эмомалӣ Раҳмон баргузор мегардад.

 Dialog.tj