Бо қарори Раиси шаҳри Душанбе бо ҳадафи ба шаҳри “сабз” табдил додани шаҳри Душанбе дар мавсими ниҳолнишонии тирамоҳи соли 2025 дар ҳудуди пойтахт 3 миллиону 999 ҳазору 630 дона гули лола шинонда хоҳад шуд.

Дар ин хусус хабаргузории “Ховар” иттилоъ дода, менависад, ки талошу тадбирҳои пайвастаи раиси шаҳри Душанбе муҳтарам Рустами Эмомалӣ дар самти ободу зебо ва сабзу хуррам кардани пойтахти мамлакат- шаҳри Душанбе аз ҳидояту роҳнамоиҳои Президенти Тоҷикистон муҳтарам Эмомалӣ Раҳмон доир ба сабзакорию ободгардонӣ ва гулзору гулпӯш намудани мамлакат сарчашма мегирад. Имрӯз ин иқдомро ҳама пиру ҷавони кишвар вазифаи хеш медонанд ва дар пайи анҷом додани он ҳастанд.

Ёдовар мешавем, ки бо амри Президенти Ҷумҳурии Тоҷикистон аз 13-уми декабри соли 2018, аз соли 2019 то ба ин сӯ, дар тамоми кишвар озмуни ҷумҳуриявии “Сайри гули лола” гузаронда мешавад. Ғолибони озмуни ҷумҳуриявии “Сайри гули лола” бо туҳфаҳои хотиравии Кумитаи рушди маҳал мукофотонида хоҳанд шуд.

Бар асоси иттилоъ, барои беҳтар намудани фестивали гулҳо зери номи “Сайри гули лола” Кумитаи рушди маҳал, вазоратҳои кишоварзӣ ва фарҳанг, Кумитаи ҳифзи муҳити зист, Агентии хоҷагии ҷангал, кумитаҳои хоҷагии манзилию каммуналӣ, телевизиону радио, рушди сайёҳӣ, кор бо занон ва оила, кор бо ҷавонону варзиш, мақомоти иҷроияи ҳокимияти давлатии вилоятҳову шаҳру ноҳияҳо, Иттифоқи нависандагон, дизайнерон ва рассомон вазифадор шудаанд.

Хабаргузории “Ховар” менависад, ки нақши гули лола дар қадимтарин осори бостонии миллати тоҷик ба назар мерасад. Қадимӣ будани нақши лола муҳраҳои сангӣ ва биринҷие, ки сабт шудаанд, беш аз 20 аср қабл аз мелодро фаро мегиранд. Дар асрҳои III-V-и мелодӣ нақши гули лола дар зарфҳои нуқрагин ва муҳраҳо бо се гулбарг ба тасвир кашида шудаанд.

Dialog.tj