Футболбози маъруфи аргентинӣ Лео Месси тавассути намояндаҳояш ба Лигаи футболи Арабистони Саудӣ муроҷиат кардааст, ки дар чор моҳи танаффуси чемпионати Амрико метавонад барои ҳолати варзишиашро аз даст надодан ба ҳайати яке аз дастаҳои арабӣ шомил гардад. Вале аз Арабистони Саудӣ қарори ғайриинтизор бароварданд, хоҳиши футболбозро рад кардаанд.

“Лигаи футболи Арабистони Саудӣ ҷойи тамрину ба дигар мусобиқаҳо омода шудан нест”, - гуфтааст вазири варзиши Арабистони Саудӣ.

Дар ин росто, бояд бигӯем, ки дастаҳои Арабистони Саудӣ бо шартномаҳои ҳангуфт Лео Мессиро ба ҳайати худ ҷалб карданӣ буданд, вале футболбоз ҳама пешниҳодҳоро рад карда буд.

Ҳоло Лео Месси дар чемпионати Амрико дар бошгоҳи “Интер-Майами” ҳунарнамоӣ мекунад ва ният дорад дар Чемпионати Ҷаҳон-2026 баромад кунад. Азбаски чемпионати Амрико зудтар ба анҷом мерасад ва фтуболбозон қариб чор моҳ танаффус доранд, ӯ хостааст, ки барои нигоҳ доштани ҳолати варзишиаш дар Лигаи футболи Арабистони Саудӣ баромад кунад, вале муваффақ нашудааст.

Агар ин кор мешуд, эътимол буд, ки ду устураи футбол Криштиану Роналду ва Лео Месси боз муқобили ҳам рақобат мекарданд ё зиёдтар аз ин, ҳамдаста мешуданд.

Ёдовар мешавем, ки чанде пеш Лео Мессии 38-сола гуфта буд, ки дар Чемпионати Ҷаҳон-2026 баромад намекунад, вале бо гузашти вақт фикрашро тағйир дод ва ҳоло ба қарорест, ки дар мусобиқаи бошукуҳ иштирок менамояд.

Dialog.tj