Дар доираи даври 20-уми Лигаи олӣ бошгоҳҳои “Истиқлол” ва “Равшан”, ки вохӯрии дастаҳои мазкурро “классико”-и футболи тоҷик меноманд, дар Варзишгоҳи марказии шаҳри Ҳисор доир гашт.

Бозии мазкур бо ҳисоби калони 6:2 ба фоидаи бошгоҳи “Истиқлол” ба анҷом расид.

Бояд гуфт, ки нахуст Аянвале Олаолува, футболбози дастаи “Равшан” дар дақиқаи 11-уми ҳисоби бозиро кушод. Сипас, Рустам Соиров, аз ҳайати “Истиқлол” дар дақиқаи 22-юм тӯбро ба дарвозаи “Равшан” ворид кард.

Ҳамин тавр, Сиёваш Ҳақназарӣ (дақиқаи 27-ум), Амирбек Ҷӯрабоев (дақиқаи 43-юм), Эҳсони Панҷшанбе (дақиқаи 78-ум), Масрур Ғафуров (дақиқаи 80-ум) ва Шон Поул Камолафе (дақиқаи 90+4-ум) ба дарвозаи “Равшан” гол заданд. Футболбози “Равшан” Шериддин Бобоев дар дақиқаи 52-юми бозӣ голи дуюми тимашро ба самар расонд.

Гуфтан бамаврид аст, ки ҳоло дар ҷадвали мусобиқа “Истиқлол” бо 37 имтиёз ва 3 бозии захира дар ҷойи дуюм аст. “Равшан” бо 33 имтиёз дар зинаи чаҳорум мавқеъ гирифтааст. “Вахш” бо 40 имтиёз садрнишин аст.

Dialog.tj