Вазирони энергетикаи Ҷумҳурии Тоҷикистон ва Ҷумҳурии Исломии Эрон дар ҳошияи панҷумин нишасти вазирони масъули захираҳои обии кишварҳои исломӣ дар шаҳри Ҷиддаи Арабистони Саудӣ оид ба роҳҳои рушди ҳамкориҳои дуҷониба ва омодагӣ барои баргузории нишасти ояндаи Комиссияи муштараки байнидавлатии ду кишвар дар шаҳри Душанберо мавриди баррасӣ қарор доданд.

Бар асоси иттилои расмӣ дар мулоқоти Далер Ҷумъа, вазири энергетика ва захираҳои оби Ҷумҳурии Тоҷикистон ва Аббос Алиободӣ, вазири неруи Ҷумҳурии Исломии Эрон ҳамчунин, ҷараёни иҷрои қарорҳои нишасти ҳабдаҳуми Комиссияи муштарак мавриди баррасӣ қарор доданд. Ҳарду ҷониб натиҷаи ҳамкориҳоро қаноатбахш арзёбӣ карданд.

Вазири энергетика ва захираҳои оби Ҷумҳурии Тоҷикистон дар ин мулоқот бо изҳори хушнудӣ аз фаъолияти неругоҳи барқи обии Сангтӯда – 2 зикр кард, ки ин лоиҳа намунаи муваффақи ҳамкориҳои созандаи миёни ду кишвар дар соҳаи энергетика аст. Ӯ таъкид намуд, ки ин неругоҳ айни ҳол тақрибан аз 4 то 5 фоиз барқи истеҳсолии кишварро таъмин мекунад. Бар асоси созиши ду ҷониб идоракунии неругоҳи Сангтӯда-2 то поёни соли 2032 дар ихтиёри ҷониби Эрон боқӣ хоҳад монд.

Ду вазир, ҳамчунин, ба рушди ҳамкориҳо дар самтҳои энергияи барқароршаванда, идоракунии захираҳои обӣ ва иҷрои тарҳҳои муштараки оянда таъкид карда, омодагии худро барои густариши робитаҳои иқтисодӣ, фаннӣ ва илмии миёни ду кишвар изҳор доштанд.

Далер Ҷумъа дар суханронии худ дар нишасти вазирони масъули захираҳои обии кишварҳои исломӣ низ таъкид кард, ки Тоҷикистон ба масъалаи обу иқлим ба ҳайси авлавияти стратегии миллӣ менигарад ва иқдомҳои ин кишвар дар ин замина аз сӯи СММ мавриди пуштибонӣ қарор гирифтааст.

“Гузар ба иқтисоди сабз аз ҳадафҳои миллии мост. Дар айни замон беш аз 98 фоизи барқи Тоҷикистон аз неруи обӣ тавлид мешавад ва ин кишвар ният дорад то соли 2032 истеҳсоли садфоизаи барқро аз сарчашмаҳои барқароршаванда амалӣ созад”- зикр намуд Далер Ҷумъа.

Dialog.tj