Дар маркази ноҳияи Данғара бинои нави Раёсати  маорифи ноҳия мавриди истифода қарор дода шуд.

Бинои бошукўҳ аз 7 ошёна ва 157  ҳуҷраи корӣ иборат буда, он дар доираи истиқболи  сазовор аз ҷашни бузурги миллӣ – 35-солагии Истиқлоли давлатӣ бо тарҳи замонавӣ ва услуби меъмории миллӣ бунёд шуда, дорои ду маҷлисгоҳи  барҳаво дар маҷмуъ бо 500 ҷойи нишаст мебошад. Ҳамзамон дар бино 2 лифти замонавӣ насб гардидааст.

Бино дорои китобхона ва ошхона бо 140 ҷойи нишаст ва ҳуҷраҳои мусоиди корӣ муҷаҳҳаз бо муосиртарин технологияи иттилоотию коммуникатсионӣ мебошад. 

Шароити фароҳамгардида дар бинои нав барои 40 корманд имконият медиҳад, ки минбаъд аҳли маориф фаъолияти худро ҷоннок намуда, дар рушди соҳа, баланд бардоштани сатҳу сифати таҳсилот ва таълиму табрияи насли худогоҳу ватандӯст саҳми намоён гузоранд.

Ҳоло дар ноҳияи Данғара 85  муассисаи таълимӣ бо фарогирии 53 ҳазору 646 хонанда фаъолият дорад. Соли равон тибқи Квотаи Президентӣ 18 хатмкарда ба макотиби олии кишвар дохил шуданд, ки 9 касашон духтарон мебошанд. Ҳамзамон барои таҳсили солҳои 2025-2026 454 омӯзгор аз курси такмили ихтисос гузаштаанд.

Дар идомаи таҳсили соли 2025 хонандагон дар олимпиадаҳои фаннии ҷумҳуриявӣ иштирок намуда, соҳиби 171 медал, аз ҷумла 13 медали тилло, 22 медали нуқра ва 136 медали биринҷӣ, гардиданд.   

Эмомалӣ Раҳмон, Президенти кишвар пас аз шиносоӣ бо иншооти нав ба сифати корҳои анҷомёфта баҳои баланд дода, ба аҳли маорифи ноҳия барои боз ҳам баланд бардоштани сифати тадрис, истифодаи васеи технологияҳои муосир, ҷалби ҳарчи бештари хонандагон ба омӯзиши фанҳои табиатшиносӣ,  дақиқ  ва риёзӣ дастуру тавсияҳо доданд.