Шоми гузашта дар Варзишгоҳи марказии шаҳри Ҳисор дастаи “Истиқлол”-и Тоҷикистон бо тими “Аз-Завра”-и Ироқ дар доираи даври сеюми марҳилаи гурӯҳии Лигаи дуюми қаҳрамонҳои Осиё рақобат кард.

Вохӯрии мазкур бо ҳисоби 2:1 ба фоидаи бошгоҳи “Истиқлол” анҷом ёфт.

Гуфтан бамаврид аст, ки меҳмонон ҳанӯз дар дақиқаи 4-ум ба дарвозаи бошгоҳи “Истиқлол” ба задани гол даст ёфтанд. Ҳамин тавр, футболбозони “Истиқлол” дар дақиқаҳои 20 ва 84-ум ба дарвозаи “Аз-Завра”-и Ироқ ду гол ворид карданд ва ғалаба ба даст оварданд. Голҳои “Истиқлол”-ро Амирбек Ҷӯрабоев ва Пол Комолафе ба самар расонданд.

Дар ҳоли ҳозир дар гурӯҳи “D” бошгоҳи “Ан-Наср” бо 9 имтиёз дар ҷойи якум қарор дорад. Бошгоҳи “Истиқлол” 6 хол дошта, дар ҷойи дуюм аст. Бошгоҳҳои “Аз-Завра” дар ҷойи 3-юм ва “Гоа” дар мақоми 4-ум қарор доранд.

Ҳамин тавр, дар бозиҳои даври чоруми марҳилаи гурӯҳии Лигаи дуюми қаҳрамонҳои Осиё “Истиқлол” дар сафар бо “Аз-Завра” вохӯрда, “Ан-Наср” дар майдони худ бо “Гоа” рақобат мекунанд.

Dialog.tj