Президенти Тоҷикистон Эмомалӣ Раҳмон рӯзи 22-уми  октябри соли 2025 варзишгоҳи нави марказии ноҳияи Восеъро, ки барои 21 ҳазор нафар тамошобин сохта шудааст, ифтитоҳ карданд.

Ба иттилои дафтари матбуоти Президент, сохтмони иншоот аз соли 2017 оғоз шуда, бо харҷи тақрибан 69 миллион сомонӣ аз ҷониби “Дирексияи сохтмони иншооти ҳукуматӣ” анҷом ёфтааст.

Майдони асосии футбол бо андозаи 105 ба 68 метр ва бо чамани табиӣ фаро гирифта шудааст. Атрофи он роҳрави резинӣ барои машқҳои дав ва мусобиқаҳои варзиши сабук ҷойгир мебошад.

Эмомалӣ Раҳмон ҳангоми шиносоӣ бо шароити варзишгоҳ бо дастаи футболи “Ҳулбук” мулоқот карда, онҳоро ба рушди маҳорати касбӣ ва муаррифии шоистаи Ватан ташвиқ намуданд.

Ин варзишгоҳ аз се ошёна иборат буда, дорои толорҳои варзишӣ, ҳуҷраҳои ивазкунии либос, маҷлисгоҳ, ҷойҳои махсус барои меҳмонони фахрӣ ва чор манораи равшанидиҳандаи шабона мебошад. Ҳамчунин, дар ҳудуди он майдончаҳои иловагӣ барои футболи хурд, волейбол ва баскетбол, таваққуфгоҳ ва зеристгоҳи барқӣ сохта шудаанд.

Мақомот мегӯянд, ки иншооти нав барои рушди варзиш, ҷалби ҷавонон ба тарзи ҳаёти солим ва баргузории чорабиниҳои варзишӣ имкониятҳои васеъ фароҳам меорад.

Бар асоси барномаи давлатии рушди футболи Тоҷикистон барои солҳои 2022–2026, танҳо дар вилояти Хатлон сохтмони беш аз 130 иншооти варзишӣ идома дорад.