Ӯзбекистон барои соли 2028 мизбонии “Конгресси байналмилалии кайҳоннавардӣ” (IAC) интихоб шуд ва дар ин замина ҳадафҳои баландпарвозонаи худро дар соҳаи илм ва технологияҳои кайҳонӣ амалӣ мекунад.

Шаҳри таърихии Самарқанд, ки дар асри XV бо обсерваторияи маъруфаш яке аз марказҳои пешрафтаи илм ва астрономия буд, дубора ҳамчун рамзи пешрафти илмӣ ҷилвагар хоҳад шуд.

Ӯзбекистон дар рақобат бо кишварҳое мисли Чин, Ҳинд ва Баҳрайн ба аввалин кишвари Осиёи Марказӣ табдил ёфт, ки чунин чорабинии ҷаҳонӣ дар он баргузор мешавад. Тақдими пешниҳодшудаи ин кишвар эҷоди “шаҳри кайҳонӣ” дар доираи Роҳи Абрешим мебошад, то иштирокдорон дар муҳити илмӣ ва фарҳангӣ фаъолият ва мубодилаи назарҳо кунанд.

Меҳиддин Ибрагимов, муовини мудири Созмони кайҳонии “UzbekKosmos” дар ин бора изҳор дошт: “Мақсади мо ҳамоҳангсозии илм ва фарҳанг буд, то Конгресс ба таҷрибае табдил ёбад, на танҳо як конфронс. Лоиҳаи шаҳри кайҳонӣ дар Самарқанд бо таваҷҷуҳи васеъ рӯ ба рӯ шуд”.

Аз таъсиси созмони кайҳонии “UzbekKosmos” дар соли 2019, Ӯзбекистон барномаи кайҳонии худро босуръат васеъ кард. Ин ниҳод аз технологияи тасвирҳои моҳвораӣ барои назорат бар манобеи об, заминҳои кишоварзӣ, ҷангалҳо ва рушди шаҳрӣ истифода мебарад ва ҳатто тағйироти миллиметрӣ дар иншоот ва маҷроҳои обиро муайян мекунад, то аз ба вуҷуд омадани буҳронҳо пешгирӣ шавад.

Соли 2024, низомҳои назоратии ин созмон зиёда аз сад ҳазор ҳолати эҳтимолии вайроншавӣ дар соҳаҳои муҳити зист ва сохтмонро ошкор карданд, ки ба беҳбуди назорат ва идораи устувори захираҳо мусоидат намуд.

Дар канори пешрафтҳои техникӣ, Ӯзбекистон заминаи ҳуқуқӣ ва ниҳодҳои нав барои рушди фаъолияти кайҳониӣ таъсис дода, истифодаи маълумотҳои моҳвораиро аз соли 2025 қонунӣ кардааст. Ҳукумати ин кишвар инчунин, ба таълим дар соҳаи технологияҳои кайҳонӣ, баланд бардоштани огоҳии аҳолӣ ва ҷалби донишгоҳҳо ва ширкатҳои хусусӣ ба лоиҳаҳои марбут таваҷҷуҳ дорад.

Dialog.tj