Субҳи имрӯз Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҳошияи Ҷаласаи Шурои сарони давлатҳои иштирокдори Иттиҳоди Давлатҳои Мустақил бо Сарвазири Ҷумҳурии Арманистон Никол Пашинян мулоқот намуданд.

Дар ин дидор ҷонибҳо масъалаҳои густариши ҳамкории дуҷонибаро баррасӣ намуданд. Эмомалӣ Раҳмон қайд намуданд, Тоҷикистон ба таҳкими робитаҳо бо Арманистон аҳамияти махсус медиҳад ва манфиатдор аст, ки ҳамкорӣ дар тамоми самтҳо рушд ёбад.

Дар ҷараёни мулоқот ба соҳаҳои тиҷорат, сармоягузорӣ, энергетика, нерӯи «сабз» ва саноат таваҷҷуҳи вижа зоҳир шуд. Ҷонибҳо зарурати фаъол кардани кори Комиссияи байниҳукуматӣ оид ба ҳамкории иқтисодиро таъкид карданд.

Ҳамчунин, масъалаҳои афзоиши гардиши мол, роҳандозии форумҳои тиҷоратӣ ва густариши муколамаи байнипарлумонӣ мавриди баррасӣ қарор гирифт.

Президенти Тоҷикистон ва Сарвазири Арманистон ҳамчунин, оид ба ҳамкорӣ дар бахшҳои фарҳанг, маориф, сиёсати ҷавонон ва сайёҳӣ табодули назар карданд.

Ҷонибҳо дар поён изҳор доштанд, ки ҳамкории фаъол дар доираи созмонҳои байналмилалӣ идома хоҳад ёфт.

Dialog.tj