Муассисаи давлатии “Тоҷикфилм” хабар медиҳад, ки 15-уми октябри соли равон дар доираи дуюмин Синамоҷашнвораи байналмилалии Душанбе “Тоҷи Сомон” Рӯзҳои синамои Эрон баргузор мегардад.

Гуфта мешавад, ки филмҳои эронии “Шаҳсавор” (коргардон Ҳусейн Намозӣ), (“Ғариза” коргардон Сиёвуш Асадӣ), “Пул дар рӯйи рӯдхонаи хурд” (коргардон Эҳсон Оқилӣ)  ва филмҳои кӯтоҳи “Ҳикояи кӯтоҳ”, “Хусрав 127”, “Бешаҳрвандӣ”, “Бозии тақдир”, “Беохир” намоиш дода мешаванд.

“Дар сатҳи баланд баргузор гардидани Рӯзҳои синамои Эрон ба рушди минбаъдаи синамои миллӣ заминаи мусоид фароҳам оварда, боиси рӯйи кор омадани лоиҳаҳои нави синамоии муштарак дар соҳаи кинематографияи ду халқи дӯсту бародар хоҳад гашт”, омадааст дар хабарномаи “Тоҷикфилм”.

Ёдовар мешавем, ки аз 15-ум то 20-уми октябри соли ҷорӣ дар кишвар дуюмин Синамоҷашнвораи байналмилалии Душанбе “Тоҷи Сомон” бо номи “Таърихи рушди тоҷикон” баргузор мегардад.

Dialog.tj