Вазорати иттилоот ва фарҳанги Иморати Исломӣ аз кашфи як ғори таърихӣ бо беш аз 500-солаи таърих дар ноҳияи Хоши вилояти Бадахшон хабар дод.

Масъулони вилояти Бадахшон мегӯянд, бар асоси таҳқиқоти ибтидоӣ ин ғор ба давраи пеш аз ислом ва асри зардуштиён тааллуқ дорад ва метавонад иттилооти арзишманде дар хусуси зиндагӣ ва ҳунари мардумони қадимаи ин минтақаро пешниҳод кунад.

Мудири бахши фарҳанг ва ҳунари Раёсати иттилоот ва фарҳанги Бадахшон гуфт, ки ин ғор дар вақти кофтани хоки як теппа аз ҷониби сокинони маҳаллӣ барои корҳои бунёдкорӣ ва бозсозӣ пайдо шудааст ва то ҳол пораҳои кӯлолӣ ва қисмҳое аз чароғдонҳои сангӣ аз он ёфт шудаанд. Ӯ гуфт, таҳқиқоти илмӣ ва баррасии дақиқ барои мушаххас кардани таърих ва хусусиятҳои таърихии ғор ҳамчунон идома дорад.

Ин кашф ба Раёсати бостоншиносии Вазорати иттилоот ва фарҳанг гузориш додааст, то гурӯҳҳои тахассусӣ бо истифода аз таҷҳизоти муосир ғорро мавриди омӯзиш қарор дода, онро ба феҳристи минтақаҳои бостонии кишвар ворид намоянд. Коршиносон бар ин боваранд, ки кашфи чунин мавзеъҳо ба ғайр аз аҳамияти илмӣ, метавонад дар шинохти тамаддунҳои қадим ва ҳифзи мероси фарҳангии Афғонистон нақши муҳим бозад.

Масъулони соҳаи фарҳанг таъкид намудаанд, ки талошҳо барои шиносоӣ ва ҳифзи чунин осори таърихӣ идома хоҳад ёфт ва пас аз анҷоми таҳқиқоти комил иттилооти бештар ба ҷомеа пешниҳод карда мешавад.

Dialog.tj