Мақомоти Вазорати корҳои хориҷии Ҷумҳурии Исломии Покистон ва Ҷумҳурии Тоҷикистон дар шаҳри Душанбе дар хусуси ҳамкориҳои муштарак ва мубориза бо терроризм дар минтақа гуфтугӯ карданд.

Вазорати корҳои хориҷии Ҷумҳурии Исломии Покистон рӯзи панҷшанбе дар изҳороте гуфт, ки дар ин нишаст дар хусуси ҳамкориҳои дифоии миёни ду кишвар низ гуфтугӯ шудааст.

Тибқи иттилои Вазорат дар ин нишаст илова ба ҳамкориҳои дифоӣ ва мубориза бо терроризм дар хусуси лоиҳаҳои интиқоли барқ, ки аз Афғонистон низ убур мекунад, баҳсу табодули назар сурат гирифт.

Ҳамзамон ду тараф дар бораи роҳҳои рушди робитаҳои тиҷоратӣ, ҳамкориҳои сиёсӣ, кишоварзӣ ва омӯзишу парвариш гуфтугӯ карданд.

Вазорати корҳои хориҷии Ҷумҳурии Тоҷикистон низ бо нашри иттилоъ гуфт, ки дар ин нишасти дуҷониба ҳайати Тоҷикистон бо роҳбарии Фаррух Шарифзода, муовини Вазири корҳои хориҷа ва ҳайати Покистон бо роҳбарии Сайидасад Алӣ Гелонӣ, муовини вазири корҳои хориҷаи Покистон ҳузур доштанд.

Ба гуфтаи ин Вазорат ҳарду тараф бар тааҳҳуди худ оид ба тақвияти бештари ҳамкории стратегии миёни Тоҷикистон ва Покистон таъкид карданд.

Ин нишаст дар ҳоле сурат мегирад, ки ду кишвари ҳамсоя Покистон ва Тоҷикистон борҳо дар хусуси вазъияти амниятии Афғонистон изҳори нигаронӣ карда буданд.

Ҳарду кишвар эълон карданд, ки ҳузури гурӯҳҳои террористӣ, монанди Таҳрики Толибони Покистон ва Ансоруллоҳ дар Афғонистон таҳдиди ҷиддӣ барои минтақа аст.

Dialog.tj