Дар вилояти Тошканди Ҷумҳурии Ӯзбекистон ҳама он кӯдаконе, ки дар натиҷаи заҳролудшавӣ дар беморхона бистарӣ шуда буданд, ҷавоб дода шуданд. Табибон гуфтаанд, ки саломатии кӯдакони заҳролудшуда комилан барқарор гардид ва ягон хавф ба ҳаёташон таҳдид намекунад.

Бино ба иттилои расмӣ чанд рӯз қабл, дар беморхонаҳои якчанд ноҳияи вилоят 1940 кӯдаки кӯдакистонҳо бистарӣ шуда буданд. Беш аз нисфи онҳо баъди гирифтани ёрии нахустин фавран ба хона ҷавоб дода шуданд. Тибқи иттилоъ, то субҳи 28-уми сентябр таҳти назорати духтурон 182 кӯдак боқӣ монда буданд, аммо то 29-уми сентябр шумори онҳо то 38 нафар коҳиш ёфт.

Вазорати тандурустии Ӯзбекистон таъкид намуд, ҳама кӯдакистонҳое, ки дар онҳо ҳолатҳои заҳролудшавии оммавӣ ба қайд гирифта шуд, аз 2-уми октябр фаъолияти худро дар реҷаи муқаррарӣ идома хоҳанд дод.

Тавре Вазорати тандурустии Ӯзбекистон шарҳ дод, тибқи қонунгузории амалкунанда таъминоти ғизо дар муассисаҳои томактабӣ аз сӯи ширкатҳои хусусӣ тибқи системаи аутсорсинг ташкил карда мешавад. Дар ин замина, шартнома риояи талаботи санитарӣ ва меъёрҳоро ҳатмӣ медонад.

Ҳамзамон, масъулон эътироф карданд, ки барои ҳодисаи рухдода дар вилояти Тошканд масъуланд ва назорат бар сифати маҳсулотро шадидтар хоҳанд кард. Аз ҷумла, ба ин раванд комиссияи ҷамъиятӣ аз ҳисоби падару модарон, мутахассисон ва рӯзноманигорон ҷалб карда мешавад. Хулосаҳои гурӯҳи корӣ пайваста дар дастраси умум нашр хоҳанд шуд.

Dialog.tj