Тавре ки маркази матбуоти Вазорати маориф ва илми Ҷумҳурии Тоҷикистон иттилоъ медиҳад, 27-уми сентябр дар Донишгоҳи давлатии Хуҷанд ба номи академик Бобоҷон Ғафуров ҷаласаи кории вазири маориф ва илм баргузор гардид, ки дар он масъалаҳои мубрами таҳсилоти олии касбӣ дар вилояти Суғд мавриди муҳокима қарор гирифт.

Гуфта мешавад, ки дар ҷаласаи мазкур Раҳим Саидзода, вазири маориф ва илми Ҷумҳурии Тоҷикистон таъкид кард, ки дар баробари пешравиҳо, ҳамоно сатҳи нокифояи сифати таълим, инчунин, иҷро нагардидани пурраи нақшаи қабули донишҷӯён ба муассисаҳои таҳсилоти олии касбӣ ба чашм мерасад.

"Вазири маориф ва илм дар суханронии худ изҳор дошт, ки таҳсилоти олӣ ва тайёр кардани кадрҳои баландихтисос, бахусус барои соҳаи томактабӣ, табиатшиносӣ, дақиқ ва риёзӣ, бояд ҳадафи муҳимми муассисаҳои таълимии минтақа бошад, зеро он бо ояндаи рушди иқтисодиву иҷтимоии кишвар иртиботи зич дорад", омадааст дар иттилоияи вахорат.

Дар ҷаласа вазири маориф иброз дошт, ки зиёд намудани шумораи ҷойҳои таҳсил дар ихтисосҳои омӯзгории равияи табиатшиносӣ, дақиқ ва риёзӣ, ҳамзамон, таъмини муассисаҳои томактабӣ бо мутахассисони баландихтисос, аз ҷумла омӯзгорони дорои тахассуси забонҳои хориҷӣ, вазифаи таъхирнопазир мебошад.

Инчунин, масъалаи омодасозии модели нави бознигарии барномаҳои таълимии ихтисосҳои омӯзгорӣ, такмили курси методикаи таълими фанҳо, таҷрибаомӯзии пайвастаи донишҷӯёни педагогӣ ва назорати КМРО ва КМД низ мавриди муҳокима қарор гирифт.

 Dialog.tj