Алексей Лихачев, Раиси ширкати давлатии “Русатом” гуфт, ки ҳамкориҳояшон бо Эрон дар соҳаи энергетикаи атомиро густариш медиҳанд.

Ӯ дар нишасти байналмилалии “Атомӣ” дар шаҳри Маскав гуфт, ширкати Русатом ба бунёди дуюм ва сеюми неругоҳи атомии Бушеҳр идома медиҳад ва ҳамзамон ҳамкорӣ бо Эрон дар заминаи технологияҳои сулҳомези атомиро пеш мебарад.

Ӯ ба имзо шудани Ёддошти тафоҳуми миёни Эрон ва “Русатом” дар хусуси бунёд кардани неругоҳи хурди атомӣ дар Эрон ишора карда, афзуд, ки рӯзи чоршанбе, 24-уми сетнябр дар шаҳри Маскав ин тафоҳумнома ба имзо расидааст. Ин тафоҳумнома чорчӯби ҳамкорӣ дар ин лоиҳаи стратегиро мушаххас мекунад.

Алексей Лихачев дар бахши дигари изҳороти худ гуфт, ки гурӯҳи БРИКС қалби низоми ҷаҳонии чандқутӣ аст ва клуби атомии БРИКС, ки аз соли 2024 таъсис ёфтааст, ояндаи дурахшон дорад.

Ӯ таъкид намуд, ки дар ин ҷараён раисони ширкат ва ташкилотҳои бузурги соҳаи атомӣ аз кишварҳои узви БРИКС ва БРИКС Плюс, аз ҷумла Русия, Эрон, Бразилия, Чин, Эфиопия, Африқои Ҷанубӣ ва Боливия аввалин нишасти худро доир намуданд. Ҳадафи асосии ин созмон рушди беҳтарин таҷриба ва роҳҳои пешрафти истифодаи технологияҳои атомӣ барои манфиатҳои сулҳомез ва рушди моделҳои татбиқи лоиҳаҳо дар кишварҳои узв мебошад.

Алексей Лихачев гуфт, ки ин ҷамоа намояндагони давлатҳоро дар бар намегирад, балки аз ширкатҳо, корхонаҳо ва ташкилотҳо иборат мебошад.

Иҷлоси Форуми байналмилалии атомӣ “Global Atomic Forum” дар доираи ҳафтаи ҷаҳонии атомӣ дар маҷмааи фарҳангӣ ва намоишгоҳи “ВДНХ” дар шаҳри Маскав доир гардид. Дар ин нишаст президенти Русия Владимир Путин ва раисони ҳайатҳои хориҷӣ, аз ҷумла Муҳаммад Исломӣ, муовини Президенти Эрон ва раиси Созмони энергеияи атомии Эрон, ҳамчунин, Александр Лукашенко, Президенти Беларусия, Никол Пашинян, сарвазири Арманистон ва дигар роҳбарони байналмилалӣ ширкат доштанд.

Dialog.tj