Ширкати миллии ҳавопаймоии Ӯзбекистон “Uzbekistan Airways” бо ширкати ҳавопаймосозии “Boeing” қарордод имзо кард ва бар асоси ин қарордод аз ин кишвар 22 ҳавопаймои “Boeing 787-9 Dreamliner” мусофиркашӣ мехарад.

Тибқи иттилоъ, ин қарордод қисми барномаи дарозмуддати модернизатсияи парки ҳавопаймоҳо ва афзоиши иқтидори хатсайрҳои дурпарвози “Uzbekistan Airways” аст. Таҳвили ҳавопаймоҳо дар соли 2031 сурат мегирад.

“Зиёд кардани парки ҳавопаймоҳои бузург ба Uzbekistan Airways имкон медиҳад, ки иқтидори мусофиркашии худро дар самтҳои калидӣ зиёд кунад, устувории ҷадвали парвозҳоро таъмин намояд ва шабакаи хатсайрҳоро рушд диҳад, то Осиёи Марказиро бо Амрикои Шимолӣ, Аврупо, Шарқи Наздик ва минтақаи Осиёву уқёнуси Ором пайваст кунад”- зикр мешавад дар изҳороти ширкати ӯзбекистонӣ.

Ин лоиҳа ба барномаи миллии рушди соҳаи ҳавонавардии Ӯзбекистон то соли 2030 посухгӯ буда, ҳадафи стратегии он табдил додани шаҳри Тошканд ба маркази асосии байналмилалии транзитӣ дар минтақа мебошад. Ин иқдом ба рушди сайёҳӣ, ҷалби сармоя ва густариши ҳамкориҳои байналмилалӣ мусоидат мекунад.

Ҳоло ширкати “Uzbekistan Airways” 10 ҳавопаймоҳои Boeing 787 Dreamliner-ро истифода мекунад. Ширкат мегӯяд, супориш додани ҳавопаймоҳои навъи Boeing 787-9 имкон медиҳад, ки ширкат хатсайрҳои тулонимасофаро ба роҳ монад.

Раиси Шурои мудирони Uzbekistan Airways Шуҳрат Худайқулов дар хусуси имзо кардани қарордод гуфт: “Бо имзои қарордоди нав мо мақоми кишварамон ва “Uzbekistan Airways”-ро   ҳамчун пешсафи авиатсияи Осиёи Марказӣ бо ҳам таҳким мебахшем ва ба мусофиронамон иртиботи ҷаҳонии боз васеътарро пешниҳод мекунем.”

Муовини президенти ширкати Boeing  оид ба фурӯш ва маркетинги тиҷоратӣ Брэд Макмаллен гуфт, ки ҳавопаймоҳои нав “Uzbekistan Airways”-ро барои “баромадан ба бозорҳои нав ва ошно кардани шумори бештари сайёҳон бо фарҳанги бойи Ӯзбекистон” кумак хоҳанд кард.

Доналд Трамп, Президенти Иёлоти Муттаҳидаи Амрико Шавкат Мирзиёевро бо имзои ин қарордоди тиҷоратӣ табрик карда, гуфт, ки маблағи умумии шартнома аз 8 миллиард доллар бештар аст. Ӯ дар шабакаи иҷтимоии Truth Social навишт: “Президент Шавкат Мирзиёев шахси қавл аст ва мо корҳои муштаракро дар самтҳои дигар идома хоҳем дод”.

Dialog.tj