Бинобар иттилои Китобхонаи миллии Тоҷикистон, пагоҳ, 23-уми сентябр дар Китобхонаи миллӣ даври ниҳоии Озмуни ҷумҳуриявии “Донандаи беҳтарини асарҳои Пешвои миллат” миёни донишҷўёни муассисаҳои таҳсилоти миёна ва олии касбӣ оғоз мегардад.

Ба навиштаи манбаъ, дар озмуни мазкур аз 41 муассисаҳои таҳсилоти олии касбӣ ва 80 муассисаҳои таҳсилоти миёнаи касбӣ зиёда аз 350 донишҷӯ иштирок мекунанд.

Гуфта мешавад, ки Озмуни ҷумҳуриявии “Донандаи беҳтарини асарҳои Пешвои миллат” аз ду давр иборат буда, даври аввал дар муассисаҳои таҳсилоти миёна ва олии касбӣ ва даври дуюм барои ғолибони даври аввал дар Китобхонаи миллӣ мегузарад.

“Талабот ба иштирокдорон ин донистани маълумоти муфассал доир ба асарҳои Пешвои миллат, доштани маълумот оид ба ҳаёт ва фаъолияти Пешвои миллат, донистани санадҳои муҳими меъёрҳои ҳуқуқӣ оид ба мақоми Пешвои миллат, Президенти Ҷумҳурии Тоҷикистон ва Ҳукумати Ҷумҳурии Тоҷикистон, донистани мероси таърихию фарҳангии моддиву маънавии халқи тоҷик, қобилияти суханварӣ, озодбаёнӣ ва ровигӣ ва дигар таъинотҳо мебошад”, зикр мекунад манбаъ.

Ёдовар мешавем, ки сарпарасти Озмуни ҷумҳуриявии “Донандаи беҳтарини асарҳои Пешвои миллат” Китобхонаи миллӣ” мебошад.

Dialog.tj