Раҳим Саидзода, вазири маориф ва илми Ҷумҳурии Тоҷикистон бидуни огоҳӣ ба Муассисаи таҳсилоти миёнаи умумии №16 ноҳияи Ёвон сафар карда, як қатор камбудиҳоро ошкор кард.

Тавре ки маркази матбуоти ин ниҳод иттилоъ медиҳад, зимни боздид маълум гардид, ки дар муассисаи мазкур, бо вуҷуди дастгирии доимии давлат, дар самти таълиму тарбия, корҳои тарбиявӣ ва таъмини интизоми меҳнат камбудиҳои муайян ҷой доранд.

“Дар муассиса 54 нафар омӯзгор ба таълими 1680 хонанда дар ду баст машғул мебошанд. Бо вуҷуди ин, дар ҷараёни дарси яке аз гурӯҳҳо мушоҳида гардид, ки танҳо 21 нафар аз 29 хонанда ҳузур доштанд, ки ин нишонаи таваҷҷуҳи нокофӣ ба масъалаи ҳозиршавии хонандагон ба дарс мебошад. Илова бар ин, аз 21 компютер дар синфхонаи компютерӣ, танҳо 3 адади он фаъол буд, ки ин ҳолат нигаронкунанда арзёбӣ гардид. Ҳолати мазкур равшан мекунад, ки нигоҳубини таҷҳизот ва таъмини дарс бо шароити зарурӣ ба таври мунтазам ба роҳ монда нашудааст ва баъзан муассисаҳо ба шуъбаҳои маориф аз бемасъулиятӣ омори саҳеҳ ироа намекунанд”, - омадааст дар иттилоияи вазорат.

Манбаъ илова мекунад, ки бархе хонандагони муассисаи мазкур ба саволҳои одӣ, аз ҷумла, муаррифии худ ба забонҳои русӣ ва англисӣ ё фаҳмиши мафҳуми “технологияи иттилоотӣ” ҷавоби дуруст дода натавонистанд.

Ҳамчунин, қайд мегардад, ки дар муассисаи мазкур омезиши гуруҳҳои синфҳои 8 ва 9 дар як соати дарсӣ мушоҳида шуд, ки хилофи талаботи меъёрҳои таълим буда, нишон медиҳад, ки ташкили дарсҳо дар баъзе мавридҳо аз рӯйи принсипҳои равшан ва қонунӣ сурат намегирад.

Масъалаи дарсшиканиву риоя нашудани либосҳои тавсиявӣ низ аз ҷумлаи камбудиҳои муассисаи мазкур гуфта мешавад.

Dialog.tj