Бинобар иттилои бахши бақайдгирии Китобхонаи миллии Тоҷикистон, давоми ду рӯз зиёда аз 300 кас узви китобхона шуда, соҳиби корти истифодабарӣ гардиданд.

Манбаъ меафзояд, ки аъзои нави Китобхонаи миллӣ донишҷӯён, хонандагон, кормандони касбу кори гуногун ва шаҳрвандони хориҷӣ мебошанд.

Гуфта мешавад, ки афзудани шумораи хонандагони Китобхонаи миллӣ ба роҳандозии Рӯзи дарҳои боз рабт дорад, зеро мақсад аз баргузории чорабинии мазкур ҷалби мардум ба китобу китобхонӣ аст.

“Меҳмонон дар Рӯзи дарҳои боз аз тамоми толорҳо ва шуъбаҳои хизматрасонӣ, осорхонаи китобҳои нодир ва китобҳои замони истиқлол дидан карда, сипас, аксари онҳо тасмим гирифтанд, ки аъзои китобхона гарданд”, - зикр мегардад дар хабарнома.

Ёдовар мешавем, ки дар Китобхонаи миллии Тоҷикистон 4-ум ва 5-уми сентябр Рӯзҳои дарҳои боз шуда гузашт, ки беш аз 2500 кас аз китобхона дидан карданд.

Dialog.tj