Имрӯз, 29-уми август дар Варзишгоҳи марказии Ҳисор дар доираи даври якуми мусобиқаи “Ҷоми миллатҳои CAFA-2025” («CAFA Nations Cup 2025»), ки аз 29-уми август то 8-уми сентябри имсол баргузор мешавад, мунтахаби футболи кишвар бо тими миллии Ҳиндустон рақобат хоҳад кард.

Дар ин росто, сармураббии тими миллии Тоҷикистон Гела Шекиладзе доир ба рақобати дарпешистода чунин гуфтааст: "Мо хеле шодем, ки мусобиқаи «CAFA Nations Cup 2025» дар Тоҷикистон баргузор мешавад. Ҳамагӣ се рӯз қабл омодагиро ба мусобиқа оғоз кардем. Ба ҳар ҳол мо дар майдони худ бозӣ мекунем, аз ин рӯ, ҳадафи аз гурӯҳ баромадан дорем. Ҳама рақибони мо дар гурӯҳ хубанд, мо бозӣ ба бозӣ омода мешавем.

Ҳамчунин, сарвони тими миллӣ Аҳтам Назаров аз мухлисон даъват кард, ки мунтахабро дар бозиҳои «CAFA Nations Cup 2025» дастгирӣ кунанд.

"Дар ҳар як рақобат тамоми қувваи худро сарф хоҳем кард. Аз тамоми мухлисон даъват менамоям, ки муттаҳид шаванд, ба варзишгоҳ биёянд ва дар бозиҳои оянда дастаи моро дастгирӣ кунанд" - афзудааст ӯ.

Ёдовар мешавем, ки бозиҳои гурӯҳи «А» дар шаҳри Тошканди Ӯзбекистон ва гурӯҳи «В» дар шаҳри Ҳисори Тоҷикистон доир мегарданд.

Ҳамин тавр, мунтахаби Тоҷикистон 29-уми август бо тими миллии Ҳиндустон, 1-уми сентябр бо тими миллии Афғонистон ва 4-уми сентябр бо тими миллии Эрон рақобат мекунанд.

Dialog.tj