Тибқи иттилои маркази матбуоти Вазорати маориф ва илми Ҷумҳурии Тоҷикистон дар соли таҳсили 2024-2025 шумораи умумии муассисаҳои таҳсилоти томактабӣ дар кишвар ба 744 адад расида, фарогирии кӯдакон дар зинаи мазкур 114 ҳазор нафарро ташкил медиҳад.

Нуктаи мазкур 27-уми август дар ҷаласаи корӣ оид ба рафти иҷрои дастуру супоришҳои пайвастаи Президенти Ҷумҳурии Тоҷикистон муҳтарам Эмомалӣ Раҳмон ва сатҳи амалисозии барномаҳои давлатии марбут ба таҳсилоти томактабӣ дар ҷумҳурӣ иброз гардид.

Дар ҷаласаи мазкур муовини сарвазири кишвар Дилрабо Мансурӣ таъкид кард, ки бо мақсади боз ҳам беҳтар гардонидани вазъи фарогирии кӯдакон ба таълиму тарбияи томактабӣ, мақомоти иҷроияи маҳаллии ҳокимияти давлатии шаҳру ноҳияҳои ҷумҳурӣ ҷиҳати амалисозии дастуру ҳидоятҳои Сарвари давлат дар ҳар маҳаллаи аҳолинишин, ки беш аз 100 хоҷагӣ дорад, муассисаи томактабиро таъсис диҳанд, ки ин иқдом метавонад барои фарогирии бештари кӯдакон заминаи мусоид фароҳам оварад.

Зикр гардид, ки дар доираи татбиқи барномаи “Барномаи давлатии рушди таҳсилоти томактабӣ барои солҳои 2020-2025” дар давоми солҳои охир шумораи муассисаҳои томактабӣ тадриҷан афзоиш ёфта, инфрасохтор ва фарогирии кӯдакон беҳтар гардида истодааст.

Ҳамзамон, “Барномаи рушди муассисаҳои томактабӣ ва таҳсилоти умумии хусусӣ барои солҳои 2022-2027”, ки ҷалби бахши хусусӣ ва афзоиши муассисаҳои ғайридавлатиро аз самтҳои афзалиятноки рушди соҳа қарор медиҳад, дар маркази таваҷҷуҳ қарор гирифт. Дар доираи ин барнома бунёди 134 муассисаи томактабӣ ва 114 муассисаи таҳсилоти миёнаи умумии хусусӣ ба нақша гирифта шудааст, ки татбиқи он дар ду марҳила амалӣ хоҳад шуд.

Dialog.tj