Дар Чикагои Амрико мусобиқаи UFC 319 баргузор гашт, ки муҳорибаи асосии он миёни Дрикус Дю Плесси ва Ҳамзат Чимаев барои камарбанди чемпионӣ дар вазни миёна буд.

Рақобати мазкур панҷ раунди пурра давом карда, бо қарори якдилонаи доварон Ҳамзат Чимаев ғолиб дониста шуда, қаҳрамони нави UFC дар вазни миёна гардид.

Ҳамзат Чимаев дар муҳорибаи мазкур, ки 25 дақиқа идома кард, зиёда аз 21 дақиқа ҳарифашро дар замин идора намуда, беш аз 500 зарба зад, ки ин рекорд аст.

Бо ин вуҷуд, қисми зиёди ҳаводорони муҳорибаҳои омехта аз чунин шакл гирифтани муҳориба норозигӣ карданд. Онҳо ба боваре буданд, ки Ҳамзат Чимаев дар раунди якум ё дуюм ҳарифашро бо тариқи бӯғӣ кардан таслим мекунад, вале дар баробари зиёда аз 21 дақиқа идора кардан дар замин ба варзишгар муяссар нашуд, ки ғалабаи фаврӣ ба даст орад.

Пас аз муҳориба, Ҳамзат Чимаев барои фавран ғолибият ба даст наовардан аз ҳаводоронаш узр пурсида изҳор дошт, ки омода аст охири моҳи октябр дар мусобиқаи UFC 321 муҳорибаи навбатиашро гузаронад.

Тибқи иттилои дастрас, дар муҳорибаи мазкур  Ҳамзат Чимаев 2 миллиону 682 ҳазор доллар ва ҳарифи ӯ Дрикус Дю Плесси 3 миллиону 792 ҳазор доллар ба даст овардаанд.

Ҳамчунин, аз Ҳамзат Чимаев пурсиданд, ки дар рӯйхати беҳтарин размкорон новобаста аз вазн худро дар ҷойи чандум мегузорад? Ӯ посух дод, ки худро дар ҷойи якум мегузорам.

Dialog.tj