Тибқи иттилои дастрас, имсол ҷоизаи инфиродии “Тӯби тиллоӣ”-ро ҳамлагари бошгоҳи “ПСЖ” Усмон Дембеле соҳиб мегардад. Дар рӯйхати мазкур ҷойи дуюм ва сеюмро ҳамлагари “Барселона” Ламин Ямал ва нимҳимоятгари “ПСЖ” Витиня ишғол кардаанд.

30 довталаби асосӣ барои ба даст овардани “Тӯби тиллоӣ” расман маълум шуданд, вале он ҷо касоне ҳастанд, ки буданашон шубҳаовар асту касоне нестанд, ки бояд мебуданд. Барои мисол, номи нимҳимоятгари бошгоҳи “Арсенал” Деклан Райсро дар ин рӯйхат ҷой додаанд, ки ӯ дар мавсими гузашта, ба ҷуз ду гол ба дарвозаи “Реал Мадрид” ворид кардан, дигар кори назаррасе накардааст. Вале дар ҳамин ҳол, нимҳимоятгари бошгоҳи шоҳонаи “Реал Мадрид” Федерико Валверде, ки дар мавсими сипаригашта аз ҷумлаи беҳтарин ва намоёнтарин футболбозон буд, дар рӯйхати мазкур ҷой нагирифт.

Дар ин росто, журналистон аз футболбози португалӣ Криштиану Роналду пурсиданд, ки дар мавриди рӯйхати довталабони имсолаи “Тӯби тиллоӣ” чӣ назар дорад, ӯ бисёр кӯтоҳ ҷавоб дод: “Ин дурӯғ аст!”.

Ёдовар мешавем, ки Криштиану Роналду панҷ маротиба ҷоизаи инфиродии “Тӯби тиллоӣ”-ро ба даст овардааст ва ду сол шуд, ки пайи ҳам дар рӯйхати довталабон мавқеъ намегирад.

Dialog.TJ