Аз 25-ум то 27-уми июл дар шаҳри Улан-Батори Муғулистон мусобиқаи Ulaanbaatar Grand Slam 2025 доир мешавад.

Ҷумҳурии Тоҷикистонро дар мусобиқаи Ulaanbaatar Grand Slam 2025 12 ҷудокор, Александра Кан (57 кг), Виктория Киселёва (+78 кг), Меҳрзод Суфиев (-60 кг), Муллораҷаб Халифаев (-66 кг), Ёсин Бобокалонов (-66 кг), Муҳиддин Асадуллоев (-73 кг), Масъуди Аҳмадзод (-73 кг), Умедҷон Раҷабов (-90 кг), Мизробшо Лоиқов (-90 кг), Кароматулло Ҳакимов (-100 кг), Муҳсин Малаев (-100 кг) ва Мансур Раҳмон (+100 кг) намояндагӣ мекунанд.

Бинобар иттилои сомонаи расмии Федератсияи байналмилалии ҷудо (IJF), барои ширкат дар мусобиқаи Ulaanbaatar Grand Slam 2025, 236 ҷудокор (142 мард, 94 зан) аз 28 кишвари ҷаҳон иштирок менамоянд.

Дар маросими қуръакашии мусобиқаи мазкур рақибони ҷудокорони тоҷик муайян шуданд.

Меҳрзод Суфиев дар даври аввал озод буда, дар даври дуюм бо намояндаи Қазоқистон Нуродил Аржан нерӯсанҷӣ мекунад. Муллораҷаб Халифаев дар даври аввал бо намояндаи Чин Хуе Зиянг гӯштин мегирад. Ёсин Бобокалонов бо Йержан Йеренкаюпов аз Қазиқистон сабқат мекунад. Масъуди Аҳмадзод дар даври аввал бо ҷудокори мизбон аз Муғулистон Энхтур Ҷугдергарав қувва месанҷад. Муҳиддин Асадуллоев дар даври аввал озод буда, дар даври дуюм бо ғолиби ҷуфти Юдай Танака аз Ҷопон ва Саидмуҳаммад Халидов аз Украина гӯштин мегирад. Умедҷон Раҷабов дар даври аввал озод буда, дар даври дуюм бо ғолиби ҷуфти Ган-Эрдене Тсеренбат аз Муғулистон ва Минки Сонг аз Кореяи Ҷанубӣ қуввасанҷӣ мекунад. Мизробшо Лоиқов даври аввалро озод паси сар намуда, дар даври дуюм бо Влад Висан аз Руминия нерӯсанҷӣ менамояд. Муҳсин Малаев дар даври аввал озод буда, дар даври дуюм бо Антон Савютский аз Украина рӯ ба рӯ мешавад. Кароматулло Ҳакимов дар даври аввал озод буда, дар даври дуюм бо ҷудокори бетараф Идар Бифов гӯштин мегирад. Мансур Раҳмон бо ҷудокори мизбон Хангарид Гантулга аз Муғулистон дар даври аввал қувваозмоӣ менамояд. Александра Кан дар даври аввал бо Яқи Гонг аз Чин ва Виктория Киселёва дар даври аввал бо ҷудокори бетараф Вероника Кафанова гӯштин мегиранд.

Dialog.tj