Дар Думаи давлатии Федератсияи Русия масъалаи муҳтавои китобҳои дарсӣ дар кишварҳои пасошӯравӣ ва роҳ ёфтани мазмуни русҳаросӣ дар китобҳо, махсусан дар китобҳои дарсии Ӯзбекистон ва Қазоқистон мавриди баррасӣ қарор гирифт.

Марина Ким, вакили Дума бо ишора ба бунёди мактабҳои ройгон аз сӯи Русия дар ин кишварҳо, афзуд, ки дар зери таъсири кишварҳои ғарбӣ дар муҳтавои китобҳои дарсӣ русҳаросӣ дарҷ мешавад ва он ба мафкураи ҷавонон таъсир мегузорад.

Ба гуфтаи ӯ, ин дар ҳолест, ки Русия дар ин кишварҳо ройгон мактаб месозад, аммо бо таъсири Ғарб дар китобҳои дарсӣ Русия чун кишвари ғосиб ва қатлиомкунанда муаррифӣ мешавад.

“Русия дар кишварҳои Осиёи Марказӣ мактабҳоро ройгон месозад, аммо наметавонад ба он чизе, ки дар ин мактабҳо таълим дода мешавад, таъсир расонад. Беш аз он, мазмуни дарсҳо рӯз аз рӯз бештар аз ҷониби фондҳои ғарбӣ дар шаклҳои гуногун танзим мешавад” – гуфт Марина Ким.

Ӯ гуфт, дар китобҳои дарсӣ, ки бо ҳимоятҳои молии созмонҳои ғайритиҷоратии ғарбӣ нашр шудаанд, симои Русия ва Иттиҳоди Шӯравӣ ба шакли таҳрифшуда тасвир шудааст. Дар Ӯзбекистон Империяи Русия ҳамчун кишвари “ғосиб” муаррифӣ мешавад, дар Қазоқистон давраи Шӯравӣ чун даври “қатли омм” инъикос мешавад. Ҳамчунин, давлатҳои ғарбӣ, ба мисли Фаронса ва Британияи Кабир дар маводҳои таълимӣ ҳамчун кишварҳои бетараф зикр мегарданд.

Марина Ким ҳамчунин, зикр кард, ки китобҳои таърихи русӣ дар аксари ин давлатҳо бо далели “мувофиқ набудан ба меъёрҳо” таълимашон манъ мешавад. Ин дар ҳолест, ки китобҳои хориҷӣ бо муҳтавои русҳаросӣ осон вориди раванди таълим мешаванд. Ӯ афзуд, мактабҳое, ки бо пули андозсупорандагони русӣ бунёд шудаанд, ба майдончаҳои ташаккули шуур ва ҷаҳонбинии ғарбӣ табдил меёбанд.

Dialog.tj