Полиси Ҷумҳурии Озарбойҷон дар як иқдоми бесобиқа вориди дафтари кории хабаргузории русии “Спутник Озарбойҷон” шуда, баъди кофтукоб, ду хабарнигори ин расонаро бо иттиҳоми ҳамкорӣ бо “ФСБ” боздошт кард. Ин иқдом ба вокуниши шадиди Вазорати корҳои хориҷии Русия рӯ ба рӯ шуд.

Вазорати корҳои хориҷии Федератсияи Русия Раҳмон Мустафоев, сафири Озарбойҷон дар шаҳри Маскавро ба вазорат даъват кард. Мария Захарова, сухангӯи Вазорати корҳои хориҷии Федератсияи Русия дар як изҳорот гуфт: “Вақте журналистони рус дар Боку беасос боздошт мешаванд ва дипломатҳо иҷозаи дидор бо онҳоро надоранд, дӯстии ду кишвар дар зери хатар қарор мегирад”.

Ҳукумати Озарбойҷон дар вокуниш ба рейди рӯзи 27-уми июн дар Екатеринбург, ки дар он ду шаҳрванди озарбойҷонӣ ба ҳалокат расиданд ва тақрибан 50 нафари дигар боздошт шуданд, хабарнигорони русро боздошт кард. Ҳамчунин, дар Боку баргузор шудани ҳама консертҳо, намоишгоҳҳо ва барномаҳои фарҳангии русӣ лағв шуд. Сафари ҳайати парлумонии Озарбойҷон ба Маскав низ бекор шуд.

Константин Затулин, депутати Думаи давлатии Русия гуфт, ки Боку “аз ҳодисаи Екатеринбург баҳона сохта, намоиши сиёсӣ” ба роҳ монд. Ба гуфтаи ӯ, чунин иқдомҳо гувоҳи онанд, ки Озарбойҷон бештар ба ҳамкорӣ бо Туркия майл дорад ва манфиатҳои стратегӣ бо Русияро нодида мегирад.

Ҳарчанд намояндагони Кремл, аз ҷумла Дмитрий Песков ба эҳтимоли таъсири ин моҷаро ба муносибатҳои дуҷониба шак оварда, таъкид намудаанд, ки “Русия ба рушди муносибатҳои неку ҳамсоягӣ бо Озарбойҷон манфиатдор аст”, вале коршиносон мегӯянд, ки ин низоъ метавонад оғози коҳиши эътимод миёни Маскав ва Боку бошад.

Dialog.tj