Масъуд Пизишкиён, Президенти Ҷумҳурии Исломии Эрон дар суҳбати телефонӣ бо Илҳом Алиев, Президенти Озарбойҷон хост, ки хабарҳои ворид шудани бесарнишинҳои Исроил аз фазои Озарбойҷон ба хоки Эрон дар ҷараёни ҷанг ба таври ҷиддӣ таҳқиқ шавад.

Масъуд Пизишкиён бо ишора ба ҳамлаи режими Исроил гуфт, ки Эрон ҳич гоҳ ҷангро оғоз накардааст, балки ин Тел-Авив буда, ки бо нақзи қонунҳои байналмилалӣ даст ба ҳамла зад. Ӯ гуфт: “Ҳамла ба марказҳои атомӣ, ҳатто дар замони ҷанг, ҷиноят бар зидди инсоният шумурда мешавад”.

Президенти Эрон афзуд, ки бар асари ин таҷовуз фармондеҳон, донишмандон ва афроди ғайринизомӣ дар Эрон кушта шуданд ва созмонҳои байналмилалӣ, бахусус Созмони Милали Муттаҳид дар маҳкум сохтани кушторҳо ва бомбаборонҳои фарогир сукут карданд. Ӯ бо интиқоди шадид аз сиёсати дугонаи Амрико гуфт, ки Вашингтон аввал гуфт Исроил бидуни иҷозати он коре нахоҳад кард, аммо ҳамла пеш аз оғози даври шашуми музокирот анҷом ёфт ва худи Амрико дар рӯзи ҳаштуми ҷанг ба муассисаҳои атомии Эрон ҳамла кард.

“Мо бо мардуми Озарбойҷон дӯст ҳастем ва риштаҳои ҳамбастагии мо бо ин кишвар амиқ ва гусастнопазир аст. Умедворем ҳамкориҳои дуҷониба пеш аз пеш тақвият ёбанд” – таъкид кард Масъуд Пизишкиён.

Ӯ аз Боку расман хост, ки гузоришҳои марбут ба эҳтимоли убури бесарнишинҳо ва ҳавопаймоҳои бесарнишини Исроил аз хоки Озарбойҷон ба хоки Эрон мавриди таҳқиқ қарор дода шавад.

Dialog.tj