Сайид Муҳаммад Хотамӣ, президенти пешини Эрон бо нашри изҳорот таҷовузи низомии Амрико ба қаламрави Эронро маҳкум кард ва онро поймол кардани қонунҳои байналмилалӣ ва ҳамла ба арзишҳои башарӣ арзёбӣ намуд.

Президенти пешини Эрон Сайид Муҳаммад Хотамӣ гуфт: “Таҷовузкорон, қабл аз он ки зерсохтҳои дифоӣ ва иқтисодии кишварро ҳадаф гиранд, дар талоши заиф кардани шуур ва иродаи умумии миллат буданд, аммо ноком монданд”.

Сайид Муҳаммад Хотамӣ бо ишора ба қурбониёни ҳамлаҳои ахир, аз ҷумла кӯдакон, занон, донишмандон ва сарбозони эронӣ гуфт, ки онҳо рамзи муқовимат ва истиқлоли Эронанд.

“Ворид шудани мустақими Амрико ба ин муноқиша нишонаи суқути ахлоқӣ ва ҳуқуқӣ дар сиёсат аст ва сулҳи ҷаҳонӣ, махсусан оромиш ва субот дар Ховари Миёна зери хатари ҷиддӣ қарор гирифтааст”- таъкид намуд Сайид Муҳаммад Хотамӣ.

Ӯ ҳимояти худро аз Неруҳои мусаллаҳи Эрон баён карда, гуфт: “Мо ба ирода ва талошҳои фидокоронаи онҳо дар дифоъ аз тамомияти арзӣ ва муқовимат бо таҷовузкорон эътимод дорем”.

Dialog.tj