Дар пайи ҳамлаи Амрико ба муассисаҳои атомии Эрон Сипоҳи посдорони ин кишвар бо нашри изҳорот гуфт, ки ҳамлаҳои амалиёти “Ваъдаи содиқ-3” идома хоҳад ёфт ва барои ҷабҳаи таҷовузгар “паёмадҳои пушаймонкунанда” хоҳад дошт.

Сипоҳи посдорони Эрон гуфт, ки ҳамлаи субҳи якшанбеи Амрико ба марказҳои сулҳомези атомии Эрон дар Фурду ва Натанз бо ҳамоҳангии комили Вашингтон ва Тел-Авив сурат гирифт. Ин ниҳоди низомӣ гуфт, ки ин амалиёт “таҷовузи ошкоро ва нақзи ошкорои маншури асосии СММ, муоҳидаи NPT ва принсипҳои истиқлол ва тамомияти арзии кишварҳо” аст. Сипоҳи посдорон афзуд, ки аз лаҳзаи нахуст маълум буд, ки амалиёти ҳамоҳангшуда бо ҳимояти комили амрикоиҳо роҳандозӣ шудааст.

"Вашингтон ба ҷои андӯхтани таҷриба аз нокомии қаблӣ, худро мустақиман дар хатти аввал қарор дод. Амрико бо такрори ҷангҳои қаблӣ дигарбора нотавонии стратегӣ ва нодида гирифтани воқеиятҳои минтақаро нишон дод”- зикр мешавад дар баёнияи Сипоҳи посдорони Эрон. Сипоҳи посдорон ишора кард, ки “теъдод ва парокандагии пойгоҳҳои низомии Амрико дар минтақа на нишони қудрат, балки омили заъф ва осебпазирии онҳо” аст.

Ҷойҳои парвози ҳавопаймоҳои ҳамлавар пурра дар зери назорат қарор дорад. Дар ин изҳорот Сипоҳи посдорон ҳушдор додааст, ки Эрон ҳаққи дифоъ дар баробари таҷовузро барои худ ҳифз мекунад. "Бо пуштибонии миллат, дар канори ҷабҳаи муқовимати исломӣ ва озодихоҳони ҷаҳон, дар дифоъ аз иззат ва амнияти Эрон устувор меистем. Ба тавфиқи илоҳӣ шоҳиди пирӯзиҳои сарнавиштсоз хоҳем буд”- таъкид кардааст Сипоҳи посдорон.

Dialog.TJ