Вазорати корҳои хориҷии Русия ба Иёлоти Муттаҳидаи Амрико ҳушдор дод, ки ҳар гуна кумаки мустақими низомии Вашингтон ба Исроил дар муқобили Эрон метавонад боиси нооромии фарогир дар Ховари Миёна гардад.

Сергей Рябков, муовини Вазири корҳои хориҷии Русия рӯзи чошанбе гуфт, ки ҳимояти низомӣ аз Тел-Авив метавонад “мувозинати ҳассос”-и минтақаи Ховари Миёнаро барҳам занад. Ӯ дар мавриди эҳтимоли кумаки низомии Амрико ба Исроил гуфт: “Ин қадаме хоҳад буд, ки вазъиятро ба шиддат бесубот мекунад. Иёлоти Муттаҳида дар хати муқаддами ҳама ҷараёнҳо қарор дорад ва ин ки бигӯем, қаблан дахолат намекард, иштибоҳ аст”.

Муовини вазири корҳои хориҷии Русия гуфт, ки чунин амалҳо на фақат боиси шиддат гирифтани низоъ хоҳад шуд, балки метавонад ба як низои фаромарзӣ табдил ёбад.

Сергей Рябков аз Вашингтон даъват кард, ки аз тасмимҳои эҳтимолии ирсоли кумаки низомӣ ба Тел-Авив худдорӣ кунад. Ӯ афзуд, ки чунин иқдомҳо метавонад “паёмадҳои ҷуброннопазир” дошта бошад ва таъкид намуд, ки Маскав бо ҳар ду ҷониб – Эрон ва Исроил дар тамоси доимӣ аст, то аз шиддат гирифтани низоъ пешгирӣ шавад.

Дар ҳамин ҳол, Сергей Наришкин, раиси Хадамоти иттилооти хориҷии Русия вазъиятро “буҳронӣ” арзёбӣ намуда, ҷонибҳоро ба хештандорӣ ва гуфтугӯ даъват кардааст.

Dialog.tj