Вазири корҳои хориҷии Ҷумҳурии Исломии Эрон Сайид Аббос Ироқчӣ дар изҳори назари тоза гуфт, ки ҳадафи ҳамлаи ҷинояткоронаи Бенямин Нетаняҳу ба Эрон пешгирӣ аз созиш миёни Эрон ва Амрико буд.

Сайид Аббос Ироқчӣ дар пайи ҳамлаҳои шаби гузаштаи Исроил дар шабакаи иҷтимоии “Х” навишт, Бенямин Нетаняҳу як ҷинояткори ҷангист, ки дар пайгарди қонун қарор дорад. Ба навиштаи Сайид Аббос Ироқчӣ, Бенямин Нетаняҳу як фиребгарест, ки тақрибан сӣ сол боз президентҳои Амрикоро фиреб додааст, то онҳоро барои расидан ба ҳадафҳои худаш ба ҷанг бикашонад.

“Ҳама далелҳо нишон медиҳанд, ки ҳамлаи ваҳшиёнаи Нетаняҳу ба Эрон, ки боиси кушта шудани садҳо ғайринизомии бегуноҳ, аз ҷумла занону кӯдакон шуд, бо ҳадафи пешгирӣ аз созиши миёни Эрон ва Амрико анҷом шудааст. Созише, ки мо дар масири дуруст ба сӯи он ҳаракат мекардем. Ӯ боз мехоҳад президент ва ҳатто беш аз он, андозсупорандагони амрикоиро комилан фиреб диҳад”- гуфт Сайид Аббос Ироқчӣ.

Вазири корҳои хориҷии Ҷумҳурии Исломии Эрон таъкид кард, неруҳои мусаллаҳи бо иқтидори Эрон ба ҷаҳониён нишон хоҳанд дод, ки ҷинояткорони ҷангӣ, ки дар паноҳгоҳҳои Тел-Авив пинҳон шудаанд, ҷазои ҷиноятҳои худро хоҳанд дид. Ӯ афзуд, Эрон то ҳар вақте ки лозим шавад, ба саркӯб кардани ин тарсӯҳо идома медиҳад, то итминон ҳосил кунад, ки онҳо дигар мардуми моро ҳадаф қарор намедиҳанд.

“Агар президент Трамп воқеан ба дипломатия бовар дорад ва мехоҳад ин ҷангро хотима диҳад, қадамҳои оянда бисёр муҳиманд. Исроил бояд таҷовузоти худро қатъ намояд. То замоне, ки таҷовузҳои низомӣ комилан қатъ нашавад, вокунишҳои мо идома хоҳанд ёфт. Фақат як тамоси телефонӣ аз Вашингтон кофист, ки як нафар мисли Нетаняҳуро хомӯш кунад. Ин метавонад роҳро барои бозгашт ба дипломатия ҳамвор созад”- афзуд Сайид Аббос Ироқчӣ.

Вазири корҳои хориҷии Эрон афзуд, даргир шудани Амрико “модари ҳама ҷангҳои абадӣ” ҳар навъ имкони роҳи ҳал ба воситаи музокиротро аз байн мебарад ва паёмадҳои хатарнок, ғайриқобили пешбинӣ ва шояд ғайри қобили тасаввур барои амнияти минтақа иқтидори ҷаҳонӣ хоҳад дошт.

“Фаромӯш накунем, Эрон оғозгари ин ҷанг набуд ва ҳеч хоҳише барои идомаи хунрезӣ надорад. Вале мо бо ифтихор то қатраи охирини хун хоҳем ҷангид, то аз сарзамин, мардум, шараф ва дастовардҳои худ ҳимоя кунем” – таъкид намуд Сайид Аббос Ироқчӣ.

Dialog.tj