Гурӯҳи террористии Толибон бо як фармони нав ворид шудани занони то синни 40 –сола ба бозори муштараки Ӯзбекистон ва Афғонстон, ки дар минтақаи марзии шаҳри Тирмиз воқеъ аст, манъ намуданд. Ин тасмими нави Толибон вокуниши шадиди соҳибкорон ва сокинони наздимарзиро барангехтааст.

Бар асоси гузориши расонаҳо масъулони идораи амри маъруф ва наҳй аз мункар дар шарҳи тасмими навашон гуфтаанд, ки занони аз 40-сола боло бо маҳрам метавонанд аз бозори муштараки Афғонистону Ӯзбекистон истифода кунанд. Қаблан вуруди занон бо ҳамроҳии маҳрам ба бозори муштарак иҷоза дода мешуд. Ҳоло ҳатто ҳамроҳи маҳрам занони то 40-сола наметавонанд вориди бозори Афғонистон ва Ӯзбекистон шаванд.

Соҳибкорони бозори муштарак гуфтаанд, ки ин маҳдудият боиси коҳиши шумори муштариёни афғонистонӣ шудааст. Яке аз фурӯшандаҳо гуфтааст, ки “пеш аз ин занон бо шавҳар ё фарзандашон меомаданд ва харид мекарданд. Ҳоло касе намеояд. Даромад базӯр харҷи иҷораи дӯконро мепӯшонад”.

Бозори муштараки Афғонистону Ӯзбекистон дар соли 2023 бо мақсади тақвияти ҳамкориҳои тиҷоратӣ ва фароҳам сохтани имконияти хариду фурӯши мустақим миёни ду кишвар дар хоки Ӯзбекистон, дар наздикии марз бо Афғонистон ташкил шуда буд. Мардуми Афғонистон метавонанд то ҳудуди 15 рӯз бидуни виза фақат дар маҳдудаи ин бозор дар хоки Ӯзбекистон фаъолият кунанд.  Гуфта мешавад, ин иқдом ба хотири густариши ҳамгироии иқтисодӣ бо ҳасмоякишвар аз сӯйи ҳукумати Ӯзбекистон гирифта шудааст.

Dialog.tj