Фармондеҳи неруҳои ҳавоӣ ва мушакии Сипоҳи посдорони Ҷумҳурии Исломии Эрон Амиралӣ Ҳоҷизода дар пайи ҳамлаҳои ҳавоии Исроил кушта шудааст. Ин хабарро мақомоти расмии Эрон тасдиқ намуданд.

Амиралӣ Ҳоҷизода, фармондеҳи ягонаи мушакии Эрон буд ва заминаи қудратманд шудани ин кишвар дар бахши қудрати мушакиро фароҳам карда буд. Ӯ амалиёти мустақими мушакии Эрон ба Исроилро дар соли гузашта шахсан раҳбарӣ карда буд.

Рейтерз ба нақл аз сарчашмаҳояш навишт, ки дар ҳамлаи субҳи имрӯзи Исроил беш аз 20 фармондеҳи низомии Эрон кушта шудаанд. Расонаҳои исроилӣ аз нақли сарчашмаҳои амниятии ин кишвар гуфтаанд, ки аксари фармондеҳони Эрон дар як пойгоҳи зеризаминӣ дар вақти тарҳрезии амалиёти низомӣ кушта шудаанд.

Ҳамлаи ҳавоии Исроил ба Эронро бисёре аз кишварҳо, аз ҷумла Арабистони Саудӣ маҳкум кардаанд. Раҳбари Кореяи Шимолӣ гуфтааст: “Эрон дар давраҳои сахт дар канори мо буд, Эронро танҳо нахоҳем гузошт”.

Дар Эрон Ситоди буҳрон ташкил шудааст. Ин ситод аз шаҳрвардон хост, ки оромиши худро нигоҳ доранд ва бо мақсади ҳифзи тартибот аз ҳар гуна амали шитобкоронае, ки боиси изтироби мардум мешавад, худдорӣ кунанд. Ин ситод гуфтааст, ки шаҳрвандони Эрон фақат ба иттилооти расмӣ ва боэътимод таваҷҷуҳ кунанд.

Dialog.tj