Президенти Эрон Масъуд Пизишкиён дар сафари корӣ ба вилояти Эломи Эрон бо ишора ба нақши муқовимати мардуми ин вилоят дар даврони ҷанги таҳмилии Ироқ бар зидди Эрон гуфт, ки миллат бо иттиҳод ва ҳидояти раҳбарӣ метавонад ба ҳама мушкилот пирӯз шавад.

Масъуд Пизишкиён зимни суханронӣ дар миёни мардуми Эрон гуфт: “Мо бо такя ба неруи имон, ваҳдати миллӣ ва дастгирии мардум метавонем Эрони обод ва озод созем, ки бар асоси зарфиятҳои ҳамин миллат рушд меёбад”.

Президенти Эрон бо ёдоварӣ аз фидокориҳои мардуми Элом дар замони ҷанг бо Ироқ гуфт: “Шумо мардуми Элом сарзамини худро тарк накардед, балки бо матонат онро дифоъ кардед. Ин муқовимат нишонаи иззати миллӣ ва шарафи миллат аст”.

Масъуд Пизишкиён афзуд, ки вазифаи давлатии вай хидмат ба мардум аст ва бо иродаи ҷиддӣ тасмим гирифта шудааст, ки вазъи кунуниро тағйир диҳад: “Бо ҳамкории ҳама ниҳодҳо талош мекунем, то мушкилоти мардумро ҳал кунем ва зиндагии онҳоро осонтар созем”.

Президенти Эрон бо ишора ба таҳримҳои шадиди хориҷӣ таъкид намуд, ки давлат бо такя ба қувваи дохилӣ ва исломӣ дар муқобили ин фишорҳо устувор хоҳад монд. Ӯ афзуд “Мо бо ҷаҳон душман нестем, аммо зери бори зулм намеравем”.

Масъуд Пизишкиён афзуд, ки Эрон навобаста ба забон ва қавмият ба ҳамаи ақвоми он тааллуқ дорад: “Ин сарзамин моли ҳама мебошад, курд, турк, лур, араб, форс, балуҷ ва ҳамаи мардумони дигари Эрон. Ҳар фарде навобаста аз зан ё мард будан, ҳақ дорад дар сиёсат ва ояндаи кишвар нақш дошта бошад”.

Dialog.tj