Ҳайати расмии Ҷумҳурии Тоҷикистон бо сарварии Қоҳир Расулзода, Сарвазири Тоҷикистон дар Форуми байналмилалии сармоягузории Тошканд ширкат намуд. Дар форум Қоҳир Расулзода суханронӣ намуда, имкониятҳои Тоҷикистон дар заминаи сармоягузорӣ ва ҳамкориҳои иқтисодиро муаррифӣ намуд.

Форуми байналмилалии сармоягузории Тошканд бо суханронии Президенти Ҷумҳурии Ӯзбекистон оғоз шуд. Президенти Ӯзбекистон Шавкат Мирзиёев баргузор шудани ин ҳамоиши сатҳи баландро иқдоми бисёр муҳим дар густариши ҳамкориҳои соҳибкорон ва сармоягузорон арзёбӣ кард.

Қоҳир Расулзода дар ҷараёни суханронӣ дар форуми мазкур ба шароити мусоиди сармоягузорӣ дар Тоҷикистон таъкид намуда, афзуд, ки тайи ҳашт соли ахир Маҷмуи маҳсулоти дохилии Тоҷикистон бо суръати миёнаи 8, 5 фоиз афзоиш ёфтааст.

Сарвазири Тоҷикистон таъкид намуд, ки пешниҳоди имтиёзҳои андозиву гумрукӣ, таъсиси панҷ минтақаи озоди иқтисодӣ, дастгирии пайвастаи бахши хусусӣ ва ҷалби технологияҳои пешрафта заминаи рушд ва густариши саноат ва бахши иҷтимоиро фароҳам овардаанд. Ӯ ишора намуд, ки фақат дар панҷ соли ахир ҳаҷми сармоягузории ҷалбшуда ба иқтисоди Тоҷикистон 11, 6 миллиард долларро ташкил додааст.

Бар асоси иттилои расонаҳои Ӯзбекистон дар форуми байналмилалии сармоягузории шаҳри Тошканд шумори зиёди роҳбарони давлату ҳукуматҳо, намояндагони созмонҳои байналмилалӣ, сармоягузорон ва соҳибкорон иштирок намудаанд.

Дар ин форум Қоҳир Расулзода шарикони рушд ва соҳибкоронро барои ширкат дар Форуми байналмилалии сармоягузории "Dushanbe Invest 2025", ки моҳи октябр дар шаҳри Душанбе баргузор мегардад, даъват намуд.

Дар доираи ин форум мулоқоти сарвазири Тоҷикистон Қоҳир Расулзода бо Президенти Ӯзбекистон Шавкат Мирзиёев баргузор шуд. Дар ҷараёни  мулоқот ҷонибҳо таъкид намуданд, ки ду кишварро робитаҳои деринаи дӯстӣ, ҳамсоягии нек ва эҳтироми дуҷониба ба ҳам мепайвандад.

Ҳамчунин, Қоҳир Расулзода бо сарвазири Ӯзбекистон Абдулло Орипов мулоқот намуда, дурнамои ҳамкориҳои иқтисодӣ, тиҷоратӣ, фарҳангӣ ва лоиҳаҳои муштараки минтақавиро мусбат арзёбӣ намуд.

Дар ҷараёни мулоқот ҷонибҳо ба густариши робитаҳо дар соҳаи истифодаи захираҳои табиӣ ва энергетика таъкид намуданд.

“Сарвазири Ҷумҳурии Тоҷикистон Қоҳир Расулзода доир шудани Форуми байналмилалии сармоягузории Тошкандро барои рушди робитаҳо дар самти соҳибкорию сармоягузорӣ муҳим арзёбӣ намуда, фарогирии бахшу соҳаҳои навро дар робитаҳои дуҷониба ба нафъи ҳарду давлат донист”  - менависад хабаргузории “Ховар”.

Dialog.tj