Русия дар вилояти Ростови ин кишвар пойгоҳи бузурги партоби паҳподҳои ҳамлаварро дар муддати тақрибан шаш ҳафта сохтааст. Бино ба гузориши хабаргузории “Ройтерз” бо такя ба аксҳои моҳвораӣ, масоҳати ин иншоот ба тақрибан 126 майдони футбол баробар аст.

Ба гузориши хабаргузории “Ройтерз”, аксҳои моҳвораии ширкатҳои “Planet Labs ва Airbus” нишон медиҳанд, ки маҳалли мазкур рӯзи 31-уми август замини холӣ буд, аммо то рӯзи чоршанбе ба маҷмааи бузурги низомӣ табдил ёфтааст.

Бунёди ин пойгоҳ дар ҳоле сурат мегирад, ки Украина интизор дорад Русия зимистони имсол ҳамлаҳои паҳподӣ ва мушакии худро афзоиш диҳад.

Пойгоҳ барои партоби паҳподҳои нав

Ба гузориши “Reuters”, Русия дар моҳҳои охир истифодаи паҳподҳои ҳамлавари дорои муҳаррики реактивиро алайҳи Украина зиёд кардааст. Ин навъи паҳподҳо бо суръати баланд ҳаракат мекунанд ва боздоштани онҳо барои неруҳои Украина душвортар аст. Суръати онҳо метавонад ба 600 километр дар як соат расад.

Майк Маник, муассис ва мудири ширкати хусусии таҳлили иттилооти низомии “DroneSec”, гуфтааст, ки пойгоҳи нав метавонад барои партоби паҳподҳои “Геран-4” ва “Геран-5” истифода шавад. Ба гуфтаи ӯ, ин ду навъ аз паҳподҳои нави реактивии Русия мебошанд.

Маник ҳамчунин, гуфтааст, ки дар қисми ғарбии ин пойгоҳ ҳашт мавқеи партоб бо релсҳои махсус дида мешавад, ки барои партоби ин паҳподҳо пешбинӣ шудаанд.

Афзоиши имконоти ҳамла ба Украина

Ба гуфтаи ин коршинос, пойгоҳи нав ба шабакаи мавҷудаи Русия, ки ҳадди ақал 11 маҳалли доимии партоби паҳподҳо барои ҳамла ба Украинаро дар бар мегирад, илова мешавад.

Вай ҳамчунин, арзёбӣ кардааст, ки сохтмони пойгоҳ қариб ба анҷом расидааст ва эҳтимолан барои оғози фаъолияти пурраи он ҳамагӣ чанд ҳафта ё ҳатто камтар вақт лозим аст.

Гузориши “Reuters” бар асоси таҳлили аксҳои моҳвораӣ ва изҳороти коршиносони низомӣ таҳия шудааст. Дар матни гузориш дар бораи оғози дақиқи фаъолияти пойгоҳ ё шумораи паҳподҳое, ки он метавонад дар як рӯз партоб кунад, маълумоти мушаххас оварда нашудааст.

Dialog.tj